Միջազգային հանրությունը պետք է ուժեղացնի ճնշումը Ադրբեջանի վրա՝ Լեռնային Ղարաբաղում բաց պատերազմից խուսափելու համար։ «Նոր պատերազմի սպառնալիքը մշտական է ու կմնա այնքան ժամանակ, քանի դեռ Ադրբեջանը չհասկանա, որ հակամարտությունը ռազմական լուծում չունի»,- հայտնել է Սարգսյանը Ֆրանսիա կատարած իր այցի ժամանակ «Ֆրանս Փրեսս» -ին տված հարցազրույցում։ Ելիսեյան պալատում նա կհանդիպի ու կճաշի Ֆրանսուա Օլանդի հետ։
Սարգսյանը նշել է,որ Իլհամ Ալիեւը խոչընդոտում է դիվանագիտական առաջընթացին ու սպառնում է ցանկացած պահի վերսկսել ռազմական գործողությունները։
«Նա ասում է, որ Ադրբեջանը չի սկսի պատերազմ, եթե Հայաստանը բավարարի նրա պահանջը։ Ես ասել եմ, որ դա շանտաժ է, այլ ոչ թե փոխզիջման որոնում»,- հայտնել է նախագահը։
Նա Փարիզին, Մոսկվային ու Վաշինգթոնին կոչ է արել ցույց տալ, թե ինչ գին պետք է վճարի կողմերից մեկը, եթե հարձակում սկսի։
«Հայաստանում գերիշխում է տեսակետ, որ ռազմական գործողությունների վերսկսումը ժամանակի հարց է, գուցե ամիսների կամ շաբաթների ու որ գերագույն գլխավոր հրամանատարը ու ՊՆ-ն պետք է պատրաստ լինեն, որ թեկուզ վաղը կարող է պատերազմ սկսվել։ Չեմ կարծում, թե նոր պատերազմը անմիջական վտանգ է, բայց պետք է պատրաստ լինել ամեն ինչի, երբ գործ ես ունենում անկանխատեսելի հարեւանի հետ»,- նշել է Սարգսյանը։
Ինչ վերաբերում է Թուրքիայի հետ հարաբերություններին, ապա հիմա նրա հետ հարաբերությունների կարգավորման գործընթացը փակուղու մեջ է, հայտնել է Սարգսյանը։
Նշելով, որ միջազգային ճնշումն ու Բաքվի ու Երեւանի միջեւ զինված ուժերի հավասարակշռությունը մինչեւ վերջերս օգնել են, որ հակամարտությունը վերահսկողությունից դուրս չգա, Հայաստանի նախագահն այնուամենայնիվ մտահոգություն է հայտնել Ռուսաստանից Ադրբեջան նորագույն սպառազինությունների մատակարարումների կապակցությամբ։ «Մենք դա ցավագին ենք տանում, քանի որ Ռուսաստանը մեր ռազմավարական գործընկերն է»,- հայտնել է Սարգսյանը։