Երեւանի Մալաթիա-Սեբաստիա վարչական շրջանում «Ելք» դաշինքի ներկայացուցիչների քարոզչական երթի ժամանակ Մալաթիա տոնավաճառի աշխատողներից մեկը դաշինքի ցուցակի 3-րդ հորիզոնականը զբաղեցնող, ԱԺ պատգամավոր Նիկոլ Փաշինյանին առաջարկել է իր հարսանիքի քավորը դառնալ՝ խոստանալով այդ դեպքում քվեարկել «Ելք» դաշինքի օգտին:
Փաշինյանն այլ տարբերակ է առաջարկել. ապրիլի 2-ին թող քվեարկի «Ելք»-ի օգտին, եւ նրա հարսանիքի քավորը կդառնա:
Քաղաքացիներից մեկն էլ Փաշինյանին հարցրել է, որ իրենց փող կտա՞ն, եթե քվեարկեն «Ելք»-ի օգտին: Փաշինյանը զայրացել է. «Հո դախլ չի՞: Գնա Սամվել Ալեքսանյանից փող ուզի: Ես փող չեմ տալիս, ելք եմ առաջարկում»:
«Ելք»-ի շրջայցն այսօր սկսվել է Շենգավիթ եւ Մալաթիա-Սեբաստիա ընտրական տարածքում դաշինքի տարածքային ընտրացուցակով առաջադրված պատգամավորության թեկնածու Արայիկ Հարությունյանի նախընտրական շտաբից:
Նիկոլ Փաշինյանը հետաքրքրվել է շտաբի աշխատանքներով. «Ի՞նչ կասեք, ինչպես է մեր վիճակը: Լավ է, չէ՞... Բայց զգուշացեք, մեզ նկարում են»: Շտաբի աշխատակիցն էլ վստահեցրել է. լրագրողներն էլ գիտեն, որ «Ելք»-ի վիճակը շատ լավ է:
