Կենտրոնական ընտրական հանձնաժողովը քարոզարշավի ընթացքում օրենքի խախտման մասին առաջին հայտարարությունն է արել. դրամական ու նյութական խոստումներով քարոզարշավը սկսած Գագիկ Ծառուկյանն օրենք է խախտում:
Արմավիրում ընտրողների հետ հանդիպմանը, սակայն, Ծառուկյանը շարունակել է խոստումներ շռայլել: Քաղաքացիներից մեկը դպրոցի համար անհրաժեշտ գույք է խնդրել. Գագիկ Ծառուկյանը խոստացել է ապրիլի 2-ից հետո բոլոր սարքավորումները տրամադրել: Մարզի գյուղերից մեկի բնակիչն էլ բողոքել է գյուղտեխնիկայի պակասից: Այս խնդրանքն էլ կկատարվի, բայց՝ դարձյալ ապրիլի 2-ից հետո:
Գագիկ Ծառուկյանը, փաստորեն, յուրովի է հասկացել Տիգրան Մուկուչյանին, եւ որոշել է մինչեւ ապրիլի 2-ը խոստանալ, իսկ դրանից հետո՝ արդեն օգնել: Ծառուկյանի մամուլի խոսնակն ասում է՝ իրենք կհետեւեն ԿԸՀ-ի հայտարարությանը, բայց, վստահեցրել է, նման դեպքերն ընտրությունների հետ կապ չունեն, Գագիկ Ծառուկյանին օգնության խնդրանքով քաղաքացիները դիմում են ցանկացած հանդիպման ժամանակ: Ի դեպ՝ մինչ բեմահարթակ բարձրանալը Գագիկ Ծառուկյանը որոշել է բազկամարտի բռնվել հավաքված տղամարդկանց հետ. հաղթել է:
Մարզեր մեկնած «Օհանյան-Րաֆֆի-Օսկանյան» դաշինքի քարոզիչների շարքերում այս օրերի ընթացքում Րաֆֆի Հովհաննիսյանին չեն տեսել: Արմեն Մարտիրոսյանն այսօր ասել է, որ նա ցանկացած պահի կարող է միանալ քարոզարշավին: Իսկ հիմա Միացյալ Նահանգներում է. կարեւոր գործնական հանդիպումներ ունի:
Նախընտրական քարոզչության շրջանակում «Ելք» դաշինքի ներկայացուցիչներն էլ այսօր Շենգավիթ եւ Մալաթիա-Սեբաստիա ընտրական տարածքում էին, ավելի ճիշտ՝ Մալաթիա տոնավաճառում: Նիկոլ Փաշինյանին այստեղ անակնկալ էր սպասում. աշխատողներից մեկը հայտնել է, որ համակրում է Փաշինյանին, հարգում նրա գործունեությունը, ավելին, ուզում է, որ իր հարսանիքի քավորը դառնա: Փաշինյանը չի մերժել: Մի քաղաքացի էլ Փաշինյանից փող է ուզել՝ ընտրություններին «Ելք» դաշինքի օգտին քվեարկելու համար: Փաշինյանը զայրացել է:
Այսօր մայրաքաղաքում է քարոզել նաեւ «Կոնգրես-ՀԺԿ» դաշինքը: Կոնդ թաղամասում քարոզչության ժամանակ միջադեպ է տեղի ունեցել: Մի կին ընդհատել է Լեւոն Զուրաբյանի ելույթն ու պահանջել հեռանալ տարածքից: Զուրաբյանն անտեսել է պահանջը, իսկ բնակիչները հետո լրագրողներին ասել են, որ կինն այս թաղամասում Հանրապետականի ներկայացուցիչն է:
Ակտիվ նախընտրական շրջանում ակտիվացել է նաեւ «ՀՀԿ-ի տատիկը»: Կառավարության շենքի առջեւ 11 տարի առաջ կորցրած իրենց բնակարանները պահանջող ցուցարար կանանց վրա բարկացել է, թե՝ մի չարաշահեք իշխանության բարությունը:
Ֆրանսիայի նախագահը կարծում է, որ խաղաղ եւ ապահով ապագա կառուցելու համար հարկավոր է շարունակել ջանքերը Լեռնային Ղարաբաղի հիմնախնդիրը կարգավորելու ուղղությամբ: Ֆրանսիայում գտնվող նախագահ Սերժ Սարգսյանի պատվին կազմակերպված պաշտոնական ճաշի ժամանակ Ֆրանսուա Օլանդը հայտարարել է, որ անցյալ տարվա ապրիլյան բախումներն ապացուցում են, որ ոչինչ այդքան վատ չէ, որքան ստատուս քվոն:
Սերժ Սարգսյանը վերահաստատել է. Հայաստանի նպատակը միայն խաղաղությունն է: Ֆրանսիայի մայրաքաղաքում հագեցած օրակարգով երկօրյա հանդիպումներից հետո Սերժ Սարգսյանը Լիոն է մեկնել: Ժերար Կոլոնի հետ հանդիպման ավարտին նախագահը քաղաքապետին պարգեւատրել է Պատվո շքանշանով՝ հայ-ֆրանսիական բարեկամական հարաբերությունների ամրապնդման եւ զարգացման գործում ներդրած նշանակալի ավանդի համար:
Լուկաշենկոն ընդդեմ Մեդվեդեւի: Բելառուսի նախագահը հայտարարել է, որ անհնար է իրենց խոնարհել ու ծնկի բերել, եւ հավելել, որ Ռուսաստանի հետ իրենց հարաբերություններում չպետք է հաշվապահություն լինի: Ալեքսանդր Լուկաշենկոն զարմանք է հայտնել, որ իրենց վախեցնում են, թե «ռուսական գազը եվրոպական արժեքով պետք է գնեն»: Հիշեցնենք, որ Եվրասիական միջկառավարական խորհրդի նիստում Դմիտրի Մեդվեդեւը հայտարարել էր, որ եթե որոշ երկրներ ԵՏՄ-ին չմիանային, ռուսական գազը եվրոպական գներով կգնեին: Ի պատասխան՝ Լուկաշենկոն նաեւ անթաքույց սպառնալիք է հնչեցրել. եթե իրենք ավելին վճարեն, Ռուսաստանը նույնպես ստիպված կլինի վճարել ինչ-որ բանի համար, եւ «այդ գինը շատ ավելի բարձր կլինի, քան բնական գազինը»:
Մարտի 9-ին դոլարն ու եվրոն շարունակել են էժանանալ: Արդյունքում դոլարի փոխարժեքն այսօր կազմել է 486 դրամ, եվրոյինը՝ 513, ռուբլունը՝ 8 դրամ 26 լումա, ֆունտինը՝ 591 դրամ:
Մարտի 10-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Զրոյից ցածր ջերմաստիճանը նահանջել է. գիշերը մայրաքաղաքում կդիտվի +1+3, ցերեկը՝ +12+14 աստիճան տաքություն: