Հայաստանին հարկավոր են այնպիսի կտրուկ փոփոխություններ, ինչպիսին ժամանակին Վրաստանում արեց Միխայիլ Սահակաշվիլին։ Այս մասին այսօր՝ մարտի 10–ին, Հրազդանում «Օհանյան–Րաֆֆի–Օսկանյան» դաշինքի հավաքին իր ելույթում ասաց դաշինքի ընտրական ցուցակի առաջին հորիզոնականը զբաղեցնող Սեյրան Օհանյանը։
«Չափազանց կոռումպացված, կիսագողական ժողովրդով, թույլ կառավարմամբ երկրում Սահակաշվիլին կտրուկ եւ կոշտ բարեփոխումներ արեց, որոնք տվեցին արդյունքը, գրեթե իսպառ վերացավ կոռուպցիան, տնտեսությունը հեղեղվեց արտաքին ներդրումներով։ Մենք Վրաստանից մի մեծ քայլ հետ ենք մնում, որովհետեւ մեզ էլ են պետք կտրուկ եւ կոշտ բարեփոխումներ»,– ասաց Օհանյանը։
Այնուամենայնիվ, ըստ Օհանյանի, Սահակաշվիլին արեց սխալներ, օրինակ, այն, որ նա երկրի տնտեսական զարգացումը պայմանավորեց հակառուսական քաղաքականությամբ։ Հայաստանը, ըստ Օհանյանի, ընդհակառակը, զարգացումը պետք է համատեղի միայն Ռուսաստանի հետ նոր որակի համագործակցությամբ, նաեւ Արեւմուտքի հետ համագործակցությունը խորացնելով։