Վարդան Օսկանյանը համոզված է, որ Հայաստանում ստեղծված իրավիճակի միակ մեղավորն իշխանությունների անգործությունն է: Իշխանափոխության դեպքում, վստահեցնում է, հնարավոր է տարեկան 1.5-2 մլրդ դոլարի ներդրում եւ դրամաշնորհ բերել Հայաստան: Ինքը ե՛ւ այդ փորձն ունի, ե՛ւ կապերը:
Հրազդանում նախընտրական հանդիպման ժամանակ Սեյրան Օհանյանն էլ վստահեցրել է, որ չի նահանջելու իր պայքարից: Օրերս պաշտպանության նախկին նախարարի մասին խոսելից Արմեն Աշոտյանն ասել էր՝ «ափսոս էր գեներալը»։ Օհանյանն այսօր արձագանքել է:
Երեկ Կենտրոնական ընտրական հանձնաժողովից նկատողություն ստացած Գագիկ Ծառուկյանն այսօր արդեն խուսափել է խոստումներ տալ: Չի ասելու՝ «ինձ ձայն տվեք, կօգնեմ», հորդորում է, որ իրեն կամ որեւէ մեկին «խաթր չանեն», քանի որ դա է քանդում մեր տունը: Ըստ Ծառուկյանի, ավելի լավ է արդար ընտրեն, որ հետո պահանջելու բան ունենան:
Իսկ Արթուր Բաղդասարյանն արդեն Արաբկիրում ընտրողներին ցուցակագրելու եւ ընտրակաշառքի մասին հավաստի տվյալներ ունի: Հորդորում է քվեարկելիս կաշառքով չառաջնորդվել, քանի որ մեր խորհրդարանին գրագետ պատգամավորներ են պետք:
Ղարաբաղյան հակամարտության կարգավորման շուրջ բանակցություններ չեն ընթանում, քանի որ անցյալ տարվա ապրիլին Արցախի դեմ ագրեսիա ձեռնարկելով՝ Ադրբեջանը շատ մեծ հարված հասցրեց գործընթացին: Արտգործնախարար Էդվարդ Նալբանդյանը հայտարարել է նաեւ, որ Հայաստանն ու համանախագահները, ամեն դեպքում, շարունակում են ջանքեր գործադրել՝ բանակցություններում տեղաշարժի պայմաններ ստեղծելու համար: Եռանախագահները Բաքու են մեկնել, իսկ մարտի վերջին կլինեն Երեւանում եւ Ստեփանակերտում:
Բաքուն, Նալբանդյանի խոսքով, շանտաժի փորձեր է անում, որոնք, սակայն, հենց իրեն են փակուղու առջեւ կանգնեցնում: Հայկական կողմը նաեւ մարդասիրաբար է մոտենում զոհերին վերադարձնելու հարցին, ինչը չի կարելի ասել Ադրբեջանի մասին:
Քանաքեռում արտակարգ դեպք է տեղի ունեցել. երկհարկանի տան հատակը փլուզվել եւ նկուղն է լցվել: Բարեբախտաբար, տուժածներ չկան: Տանը բազմանդամ ընտանիք է ապրում. 14 հոգանոց ընտանիքի 7 անդամներն անչափահաս երեխաներ են: Տանտիրուհին պատմել է, որ տունը շատ հին է՝ 1955 թվականին է կառուցվել: Պատկան մարմինների ներկայացուցիչները եկել են, նկարահանել ու խորհուրդ տալով փլուզվող սենյակ չմտնել՝ հեռացել: Համայնքապետարանից խոստացել են օգնել՝ նորոգել փլուզված հատվածը:
Երեւանի Թբիլիսյան խճուղու եւ Սարկավագի փողոցի խաչմերուկում բախվել են Օpel եւ Mercedes մակնիշների մեքենաները: Պատահարի հետեւանքով վարորդներն ու Mercedes-ի ուղեւորը՝ 33-ամյա Անի Խոջոյանը, մարմնական վնասվածքներով հիվանդանոց են տեղափոխվել: Վթարից հետո Mercedes-ը բախվել է նաեւ մոտակա առեւտրի տաղավարներին։
Հենրիխ Մխիթարյանը Եվրոպայի լիգայի 1/8 եզրափակիչի առաջին խաղում գրավել է «Ռոստովի» դարպասը՝ կրկնելով «Մանչեսթեր Յունայթեդի» ռեկորդներից մեկը: Անգլիացի հարձակվող Ուեյն Ռունիից հետո Հայաստանի հավաքականի ավագն անգլիական ակումբի առաջին ֆուտբոլիստն է, որը եվրագավաթներում գոլ է խփում 3 խաղում անընդմեջ: Եվրոպայի լիգայի նախորդ 2 խաղերում Մխիթարյանը գրավել էր ֆրանսիական «Սենթ Էթյենի» եւ ուկրաինական «Զարյայի» դարպասը:
Ռոստովում տեղի ունեցած խաղն ավարտվել է 1:1 հաշվով, իսկ մկանային վնասվածքից վերականգնված եւ 2 խաղ բաց թողած հայ կիսապաշտպանը մեկնարկային կազմում հանդես է եկել 67 րոպե ու խփել հյուրերի միակ գոլը: Հենրիխ Մխիթարյանն ՈւԵՖԱ-ի վարկածով ընդգրկվել է Եվրոպայի լիգայի 1/8 եզրափակիչի առաջին խաղերի խորհրդանշական հավաքականում: Նա ՈւԵՖԱ-ի վարկածով նաեւ հանդիպման լավագույն ֆուտբոլիստ է ճանաչվել:
Մարտի 10-ին դոլարը շարունակել է արժեզրկվել, իսկ եվրոն ավելի քան 2 դրամով թանկացել է: Արդյունքում դոլարի փոխարժեքը կազմել է 486 դրամ, եվրոյինը՝ 515, ռուբլունը՝ 8 դրամ 24 լումա, ֆունտինը՝ 591 դրամ:
Մարտի 11-ի գիշերը հանրապետությունում սպասվում է առանց տեղումների եղանակ, իսկ կեսօրից հետո շրջանների մեծ մասում կարճատեւ տեղումներ կլինեն, լեռնային գոտիներում՝ ձնախառն անձրեւ: Երեւանում նույնպես վաղը կեսօրից հետո ժամանակ առ ժամանակ կարճատեւ անձրեւ է սպասվում: