Հայաստանին անհրաժեշտ է դուրս գալ ԵՏՄ-ից, գազի սակագների հարցում դրանից երկիրը նույնիսկ կշահի։ Այս մասին հայտնել է նախկին վարչապետ, «Ազատություն» կուսակցության ղեկավար ու «Ազատ դեմոկրատներ» կուսակցության համամասնական ցուցակի անդամ Հրանտ Բագրատյանը։
Հայաստանը գազը ստանում է սահմանին 150 դոլարով, իսկ բնակչությանը վաճառում՝ 290 դոլարով։ Բելառուսը գազը ստանում է 132 դոլարով, իսկ բնակչությանը վաճառում 180-ով։
«Հայաստանում խոսք անգամ չի կարող լինել սահմանին շահավետ գնի մասին, քանի որ այն վաճառում է «Գազպրոմը», իսկ Հայաստանում գնում է դարձյալ «Գազպրոմը»։ Այսինքն դա է նրա հավելագինը»,- հայտնել է Բագրատյանը։
Նկատենք, որ Բելառուսում գազատրանսպորտային օպերատորը պատկանում է «Գազպրոմին» ( 2012-ին այն ձեռք է բերել «Բելտրանսգազը»)։
«Իսկ եթե Ռուսաստանը որոշի, որ մեզ գազ չի վաճառի, մենք այն Իրանից կգնենք։ Թող Իրանը մեզ 200 դոլարով վաճառի։ Մենք հանգիստ կկարողանանք այն վերջնական սպառողին վաճառել 220-230 դոլարով»,- ասել է Բագրատյանը։