Մարդը պետք է «ֆոկուսչիկ» լինի, որպեսզի ապրի ամսական 16 հազար դրամով եւ վճարի գազի, էլեկտրաէնեգրայի ու ջրի համար: Այս մասին այսօր՝ մարտի 13-ին, Ապարանում ընտրողների հետ հանդիպման ժամանակ ասել է «Ծառուկյան» դաշինքի առաջնորդ, «Բարգավաճ Հայաստան» կուսակցության նախագահ Գագիկ Ծառուկյանը:
«Ինչպես է մեր ժողովուրդն ապրում այդպիսի գումարով, ես չգիտեմ», - ասել է նա:
Գագիկ Ծառուկյանի խոսքով՝ շատերն իրենից օգնություն են խնդրում, քանի որ բարերար են համարում: «Այդպիսի մարդ չկա, ով դիմի ինձ, եւ ես նրան չօգնեմ»,-նշել է նա: Բայց, ինչպես հավելել է Գագիկ Ծառուկյանը, օրերս ԿԸՀ ղեկավար Տիգրան Մուկուչյանն արգելել է իրեն որեւէ բան, նույնիսկ խոստումներ տալ ժողովրդին: «Այնպես որ, ես ոչինչ ձեզ չեմ խոստանում, քանի որ պարոն Մուկուչյանն արգելել է»,-ասել է Ծառուկյանը:
Նա նաեւ նշել է, որ Հայաստանում նախատեսված է տարեկան 5-7 տոկոսի չափով տնտեսական աճ: Այդ տոկոսներից յուրաքանչյուրը պետք է բյուջե բերեր 21 մլրդ դրամ, եթե հանվեն 18 մլրդ դրամ տուրքերը: Գագիկ Ծառուկյանի խոսքով՝ Հայաստանում 7 տոկոս տնտեսական աճի դեպքում յուրաքանչյուր տարի կլիներ 126 մլրդ դրամ, որը կարելի էր օգտագործել հօգուտ կենսաթոշակների ու աշխատավարձերի բարձրացման:
