Իրանի եւ Եվրասիական տնտեսական միության միջեւ ազատ առեւտրի գոտու վերաբերյալ փաստաթուղթը, հնարավոր է, ստորագրվի Իրանի նախագահ Հասան Ռոհանիի Մոսկվա այցի ընթացքում: Այս մասին հայտնել է ՌԴ էներգետիկայի նախարար Ալեքսանդր Նովակը Իրանի տեղեկատվական-հաղորդակցությունների տեխնոլոգիաների նախարար, ռուս-իրանական միջկառավարական հանձնաժողովի համանախագահ Մահմուդ Վայեզիի հետ հանդիպման ժամանակ, փոխանցում է ՏԱՍՍ-ը:
«Երեկ եւ այսօր Թեհրանում է Իրանի եւ ԵՏՄ-ի միջեւ ազատ առեւտրի գոտու վերաբերյալ համաձայնագրի հարցով պատվիրակությունը: Ակտիվ աշխատանք է տարվում փաստաթղթի տեքստի համաձայնեցման շուրջ, հուսով ենք, որ Մոսկվա Իրանի նախագահի այցի ժամանակ փաստաթուղթը ստորագրման համար պատրաստ կլինի»,- ասել է նա:
Ավելի վաղ հաղորդվել է, որ Իրանի հետ ազատ առեւտրի գոտու համաձայնագիրը կիրականացվի մի քանի փուլով: Դա նշանակում է, որ ազատ ռեժիմը նախ կգործի միայն ապրանքների որոշակի շրջանակի համար: Դեռեւս չի հաստատվել ապրանքների վերջնական ցուցակը, որոնք կմտնեն ազատ առեւտրի համաձայնագրի առաջին փուլ: Իրանի հետ ազատ առեւտրի գոտու ստեղծման առաջին փուլը կարող է ներառել թեթեւ արդյունաբերության եւ ագրոարդյունաբերական համալիրի արտադրանքը:
Դրա հետ մեկտեղ նշվել է, որ Իրանի հետ ազատ առեւտրի գոտու ստեղծումը դժվարացնում է այն, որ Իրանը չի անդանակցում Առեւտրի համաշխարհային կազմակերպությանը: