ՀՅԴ-ն այսօր՝ մարտի 13-ին իր քարոզարշավն է իրականացրել Լոռու մարզում:
Սպիտակի տարածաշրջանի Շիրակամուտ գյուղում ՀՅԴ-ական թեկնածուները, ներկայացնելով կուսակցության աշխատանքը, դիմեցին գյուղացիներին. «Մենք առաջին օրվանից, երբ փորձեցին այս երկիրը շեղել, այս նախագահական համակարգն ընտրեցին 91 թվականից, այդ ժամանակվանից ասում ենք, որ սա լավ տեղ չի տանելու, սխալ ճանապարհ եք բռնել: Ապրիլի 2-ից հետո դուք նոր Հայաստանի մեջ եք լինելու, որովհետև մենք այսպես թե այնպես ուղղությունը փոխել ենք, երկրի զարգացման ընթացքը փոխել ենք, ճիշտ ուղղության վրա է հիմա երկիրը կանգնած: Այդ ուղղությամբ շարժվելով երկիրը ճիշտ տեղ կհասնի, բայց մեր խնդիրն այն է, որ այդ ուղղությամբ արագ գնանք»,- իր խոսքում նշեց ՀՅԴ բյուրոյի ներկայացուցիչ Արմեն Ռուստամյանը՝ շիրակամուտցիներին հորդորելով քվեարկել ՀՅԴ-ի օգտին:
Շիրակամուտցիները ջերմորեն էին տրամադրված ՀՅԴ թեկնածուների նկատմամբ, հաշվի առնելով հատկապես այն հանգամանքը, որ Լոռու մարզում ՀՅԴ թեկնածուների 4-րդ հորիզոնականն զբաղեցնող Արմենուհի Կյուրեղյանը ակունքներով այդ գյուղից է:
«1000-ից մեկ առիթ է ստեղծվել, որպեսզի մեր գյուղացին դառնա պատգամավոր: Այսինքն՝ մեր դարդ ու ցավը մեր աղջիկը պետք ա լուծի, մեր տան մեջից ա: Հիմա դուք լավն եք, լավը չեք, Արմենուհին ձեզնից 1000 անգամ լավն ա: Դրա համար մենք իրան պետք ա ընտրենք»,- համագյուղացուն ուղեկցողներին դիմեցին գյուղացիները, խոստանալով քվեարկել Ա. Կյուրեղյանի օգտին:
Հանդիպման ավարտին գյուղացիները բարձրաձայնեցին նաև իրենց հուզող խնդիրների մասին. հիվանդանոց չկա, գյուղի կեսը զրկված է խմելու ջրից, գյուղացին արտադրանքի իրացման խնդիր ունի:
