Ոստիկանության պետի տեղակալ Լեւոն Երանոսյանի եղբայրը՝ Լեռնիկ Երանոսյանը, ունի փակ գանգուղեղային տրավմա, նրա վիճակը կայուն է: Այս մասին այսօր՝ մարտի 14-ին, NEWS.am-ի հետ զրույցում ասաց «Նաիրի» ԲԿ-ի տնօրեն Անատոլի Գնունին: Նա նշեց, որ Լեռնիկ Երանոսյանն արդեն տեղափոխվել է հիվանդասենյակ:
«Կայուն, հանգիստ վիճակում է, տեղափոխվել է հիվանդասենյակ»,-ասաց նա:
Մարտի 12-ի երեկոյան Լեռնիկ Երանոսյանը տեղափոխվել էր Էջմիածնի հիվանդանոց, որից հետո որոշում էր կայացվել տեղափոխել Երեւան:
Նշենք, որ Երանոսյանը հիվանդանոց է տեղափոխվել Ջրառատում տեղի ունեցած միջադեպից հետո:
Ըստ ՔԿ հաղորդագրության՝ մարտի 12-ին, ժամը 18:25-ին, Վաղարշապատի հիվանդանոցից ահազանգ է ստացվել, որ «ձախ այտի կոպի շրջանի սալջարդային քերծվածքներ, գլխի, որովայնի, կրծքավանդակի վերին վերջույթների սալջարդ» ախտորոշմամբ բուժօգնության է դիմել Լեռնիկ Երանոսյանը, որը հայտարարել է, որ իրեն ծեծի են ենթարկել Ջրառատ գյուղում: Նույն օրը՝ ժամը 19:40-ին, Վաղարշապատի հիվանդանոցից ոստիկանության Վաղարշապատի բաժին ահազանգ է ստացվել, որ «աջ կոպի հեմատոմա, սալջարդ» ախտորոշմամբ հիվանդանոց բուժօգնության են ընդունվել Միքայել Բաբոյանը եւ հայտարարել, որ վնասվածքն ստացել է Ջրառատ գյուղում վիճաբանության ժամանակ:
Ըստ «Օհանյան-Րաֆֆի-Օսկանյան» դաշինքի տարածած հաղորդագրության՝ միջադեպը տեղի է ունեցել այն բանից հետո, երբ իրենց դաշինքը բարեհաջող հանդիպում է ունեցել ջրառատցիների հետ: Հանդիպումից հետո ծեծկռտուք է տեղի ունեցել, որի հետեւանքով տուժել է նաեւ ՕՐՕ դաշինքի ակտիվիստներից մեկը: Դեպքից հետո բերման է ենթարկվել 6 անց, հետո բոլորին ազատ են արձակել: