Արմավիրի մարզի Ջրառատ գյուղում այսօր՝ մարտի 14-ին, տեղի ունեցած միջադեպի հետեւանքով հիվանդանոց տեղափոխվածներից մեկն անչափահաս է: NEWS.am-ի հետ զրույցում «Էրեբունի» ԲԿ-ի տնօրեն Միքայել Մանուկյանը նշեց, որ Ջրառատից իրենց մոտ է տեղափոխվել 3 քաղաքացի՝ տեղափոխվածներից 17-ամյա Արայիկ Մելքոնյանի մոտ առկա է ծղիկոսկրի կոտրվածք, 26-ամյա Հակոբ Մելքոնյանի մոտ՝ ձախ ոտնաթաթի հրազենային թափանցող վնասվածք, ձախ քունքային շրջանի պատռված վերք, իսկ 53-ամյա Մելիք Մելքոնյանի մոտ՝ ձախ եւ աջ նստատեղերի կտրած-ծակած վերք:
Միքայել Մանուկյանի խոսքով, այս պահին երեք հիվանդն էլ Վերակենդանացման բաժանմունքում են, անհրաժեշտ բուժօգնությունից հետո նրանք կտեղափոխվեն հիվանդասենյակ:
Ավելի վաղ ոստիկանությունից տեղեկացրել էին, ու միջադեպը տեղի է ունեցել դպրոցի աշակերտների միջեւ, որին միջամտել են մեծահասակները:
Ըստ նախնական տեղեկությունների՝ վիճաբանությունը սկսվել է դպրոցում աշակերտների միջեւ, ինչին միջամտել են մեծահասակները։
Վիճաբանող կողմերից մեկի մոտ ինքնաձիգ է եղել, որը մասնակիցները փորձել են վերցնել նրանից: Ըստ նախնական տեղեկությունների՝ սկսվել է քաշքշոց, որի ընթացքում արձակվել է կրակոց, երեք հոգի տեղափոխվել են հիվանդանոց:
Նրա խոսքով, ոստիկանության ծառայողները առգրավել են ինքնաձիգը, կատարվում են համապատասխան միջոցառումները:
Ավելի վաղ «Օհանյան-Րաֆֆի-Օսկանյան» նախընտրական շտաբը հաղորդագրություն էր տարածել, որ Արմավիրի մարզի Ջրառատ գյուղում Հայաստանի Հանրապետական կուսակցության (ՀՀԿ) տեղական կառույցի ներկայացուցիչները զինված հարձակում են գործել «Օհանյան-Րաֆֆի-Օսկանյան» դաշինքի համակիրների վրա, որի արդյունքում կան վիրավորներ:
Դաշինքի ցուցակի 2-րդ հորիզոնականը զբաղեցնող Արմեն Մարտիրոսյանը «Ազատություն» ռադիոկայանի հայտնել է, որ իրենց համակիրներից վիրավորված անձինք կան, նրանց տեղափոխում են հիվանդանոց: