Հայաստանում քաղաքացիական ավիացիայի բացակայության գլխավոր պատճառներից մեկը «բաց երկնքի մասին» համաձայնագիրն է: NEWS.am-ի հետ զրույցում այս մասին ասաց Հայաստանի Կոմունիստական կուսակցությունից պատգամավորի թեկնածու, ԽՍՀՄ վաստակավոր օդաչու, «Օդաչուների ազգային միավորում» հասարակական կազմակերպության նախագահ Դմիտրի Աթբաշյանը:
Նրա խոսքով՝ երբ քննարկվում էր «բաց երկնքի մասին» համաձայնագրի ստորագրման հարցը, ԱՄՆ դեսպանը ջանադրաբար քարոզում էր դրա օգտին: «Բայց հիմա ինքը՝ Միացյալ Նահանգներն է փորձում իր երկինքը փակել, թեկուզ մասնակի, ինչ-որ ձեւով ազդելու համար իր տարածքում օդային շարժման վրա: Այդ դեպքում ինչո՞ւ մենք պետք է հետեւենք իրենց խորհուրդներին»,- հարց հնչեցրեց Աթբաշյանը:
Նա ընդհանրապես դեմ չէ «բաց երկնքի» քաղաքականությանը: «Պարզապես բոլոր երկրները, որոնք ստորագրում են այս համաձայնագիրը, այն պահերն են նախատեսում, որոնք թույլ են տալիս այս քաղաքականության վրա այնպես ազդել, որ սեփական ավիացիան զարգանա: Գլխավոր պատճառներից մեկը, որի հետեւանքով Հայաստանում քաղաքացիական ավիացիա չկա, «բաց երկնքի մասին» համաձայնագրի այս չմտածված ստորագրումն է: Հարկավոր է մեզ մոտ թռչող արտասահմանյան ավիաընկերություններին այնպես հարկել, որ նրանք չկարողանան մրցակցել եւ խանգարել հայրենական ավիացիայի զարգացմանը: Հայաստանի հետ համաձայնագրում ոչ մի նմա բան նախատեսված չէ: Այն պատրաստել է «Մաքինզի» ընկերությունը, որը սպասարկում է ոչ միայն Հայաստանին, այլ հնարավոր է նույնիսկ՝ մեր հակառակորդներին եւ մրցակիցներին: Նրանք իրենց փողերն ստացան ու հեռացան, իսկ մեք ավիացիա չունեցանք, եւ ոչ ոք դրա համար պատասխան չի տալիս»,- նշեց Դմիտրի Աթբաշյանը: