Հայաստանը մեծ ներուժ ունի դեպի Իրան ու Պարսից ծոց տարանցման ոլորտում։ Այս մասին հայտնել է Հայաստանի նախագահ Սերժ Սարգսյանը Մոսկվայում մարտի 15-ին Ռուսաստանի նախագահ Վլադիմիր Պուտինի հետ համատեղ ճեպազրույցի ժամանակ։
Սերժ Սարգսյանը հիշեցրել է, որ Ռուսաստանը Հայաստանի խոշորագույն առեւտրային գործընկերն է։ 2016-ին երկու երկրների միջեւ ապրանքաշրջանառությունն աճել է 15 տոկոսով, այս տարվա հունվարին գրանցվել է աճ՝ անցած տարվա համապատասխան ցուցանիշի համեմատ։Նախագահի խոսքով դա վկայում է այն լուրջ ներուժի մասին, որը պետք է գործածել նաեւ ԵՏՄ-ի միջոցով։
Որպես կազմակերպության անդամ՝ Հայաստանը շահագրգռված է, որ համագործակցությունը խորանա,մեխանիզմները լիարժեք՝ առանց արհեստական խոչընդոտների գործարկվեն, նաեւ բարձրանա կազմակերպության հեղինակությունը, նշեց նախագահը։ Նրա խոսքով, Հայաստանում ռուսական ներդրումների իրական ծավալը գերազանցում է 4․5 մլն դոլարը։ Ռուսական բիզնեսը ներկայացված է հայկական տնտեսության բոլոր ոլորտներում։ Դա ավելի քան 1400 ձեռնարկություն է, իսկ եթե հաշվի առնվեն նաեւ անհատ ձեռներեցությունը, ապա՝ ավելի քան 2 հազար։
«Մենք պատրաստ ենք պատշաճ ուշադրություն հատկացնել տրանսպորտային լոգիստիկ ծառայությունների ոլորտի որոշ նախագծերի։ Տեսնում ենք մեծ ներուժ ՝ դեպի Իրան ու Պարսից ծոց տարանցման ապահովման գործում»,- նկատել է Սերժ Սարգսյանը՝ շեշտելով տարածաշրջանային համագործակցության կարեւորությունը։
