Ռուսաստանն անկեղծորեն շահագրգռված է կայուն, անկախ եւ դինամիկ զարգացող Հայաստան տեսնելու հարցում: Մոսկվայում Հայաստանի նախագահ Սերժ Սարգսյանի հետ հանդիպումից հետո այս մասին հայտարարել է Ռուսաստանի նախագահ Վլադիմիր Պուտինը:
Նշելով, որ առաջիկայում Հայաստանում խորհրդարանական ընտրություններ են անցկացվելու՝ Պուտինը հայտարարել է, որ Հայաստանի իշխանությունները եւ անձամբ Սերժ Սարգսյանը մեծ ջանքեր են ներդնում, որպեսզի նախընտրական արշավը, քվեարկության գործընթացը եւ արդյունքների ամփոփումը իրականացվեն ազատ եւ ժողովրդավարական հիմքով:
Նրա խոսքով՝ Մոսկվայի եւ Երեւանի հարաբերություններն իրավամբ բարեկամական եւ դաշնակցային բնույթ ունեն: «Շատ շուտով՝ ապրիլի 3-ին, կնշենք կարեւոր տարեթիվ՝ դիվանագիտական կապերի հաստատման 25-ամյակը: Ռուսաստանը եւ Հայաստանն անկեղծորեն ձգտում են փոխշահավետ համագործակցության եւ բազմակողմանի ռազմավարական գործընկերության խորացմանը»,- նշել է Պուտինը: