Անհրաժեշտ է ստուգել Հայաստանում իրացվող նավթամթերքների որակը։ Այս մասին մարտի 16-ին կառավարական նիստի ժամանակ հայտարարել է ՀՀ վարչապետ Կարեն Կարապետյանը։
Նրա խոսքով՝ հաճախ խնդիր է ծագում վառելիքի՝ ըստ տեսակների սխալ բաշխման պատճառով, ինչպես նաեւ գործնական մի շարք բացթողումների պատճառով։ Արդյունքում տուժում են սպառողները։ Կարապետյանը հանձնարարել է տնտեսական զարգացման ու ներդրումների նախարարին մեկ ամսում կառավարությանն առաջարկություն ներկայացնել՝ թերությունների չեզոքացման եւ ըստ տեսակների՝ վառելիքի առավել հստակ հաշվառման վերաբերյալ։
Փետրվարի վերջին ընդդիմադիր պատգամավոր Նիկոլ Փաշինյանը բողոք է հայտնել, որ տեղի ընկերություններից մեկին մաքսայինում թույլ չեն տվել Իրանից նավթ ներկրել։ Ի պատասխան՝ վարչապետն ասել է, որ պատճառը նավթամթերքի որակն է։ Դրանից հետո նա նաեւ հայտարարել է, որ նման խնդիրներ են ծագել նաեւ 2016-ին Արցախում ապրիլյան պատերազմի ժամանակ ռազմական տեխնիկան լիցքավորելիս։ Այս հայտարարությունը մեծ արձագանք էր առաջացրել։