Մարդու իրավունքների եվրոպական դատարանը (ՄԻԵԴ) շրջանառության մեջ է դրել Ադրբեջանի դեմ 23 գործ՝ կապված ապրիլյան պատերազմի ընթացքում հանցագործությունների հետ։ Այս մասին հայտնել է ՄԻԵԴ-ում ՀՀ ներկայացուցիչ Գեւորգ Կոստանյանը՝ մարտի 16-ին լրագրողների հետ հանդիպման ժամանակ։
Նրա խոսքով՝ ՄԻԵԴ-ում ավելի քան 700 հայց է ներկայացվել ընդդեմ Ադրբեջանի, աշխատում են իրավաբանների մեծ խումբ ու իրավապաշտպաններ։ Հայաստանի կառավարությունը ներգրավված է որպես երրորդ կողմ եւ կներկայացնի իր դիրքորոշումը։
«Ադրբեջանում հայտարարել են 500 հայցի մասին։ Սակայն փաստն այն է, որ դեռեւս շրջանառության մեջ է դրվել 5 հայց, ինչի մասին տեղեկացված է Հայաստանը։ Իսկ Ադրբեջանի դեմ շրջանառության մեջ է դրվել արդեն 23 հայց», - հայտնել է Գեւորգ Կոստանյանը։
Հիշեցնենք, որ անցյալ տարվա ապրիլին Ադրբեջանը լայնածավալ ագրեսիա իրականացրեց ընդդեմ Արցախի։ Ագրեսիայի ընթացքում կատարվել են բազմաթիվ հանցագործություններ ու մարդու իրավունքների խախտումներ՝ խաղաղ բնակչության ու զինծառայողների նկատմամբ։