Ստամբուլի նահանգապետարանը Պոլսո հայոց պատրիարքարանում տեղի ունեցած տեղապահի ընտրությունից հետո գրություն է ուղարկել պատրիարքարան։
Ինչպես տեղեկացնում է Ստամբուլի հայկական «Ակոս»–ը, Պատրիարքական տեղապահի Ընտրությունների արդյունքները հայտարարելուց հետո Արամ Աթեշյանը լրատվամիջոցների ներկայացուցիչներին և ներկաներին բաժանել է Ստամբուլի նահանգապետարանից ստացված գրությունը, որում նշվում է, որ պատրիարքական ընտրություններ իրականացնելը իրավականորեն անհնար է։
Պատրիարքական տեղապահի ընտրությունների առնչությամբ Ստմաբուլի նահանգապետարանից կատարված միջամտության առնչությամբ հայտարարությամբ է հանդես եկել ընտրված տեղապահ Գարեգին Բեքչյանը։
Նա նշել է, որ պատրիարքարանից մի խումբ՝ այդ թվում Արամ Աթեշյանն ու Սահակ Մաշալյանը, այցելելու են Ստամբուլի նահանգապետարան։ «Ես նահանգապետարան չեմ գնալու։ Այցի ընթացքում մերոնք պատրիարքական տեղապահի ընտրությունների տրամաբանությունն են բացատրելու։ Այնուհետեւ հայտարարություն է արվելու։ Սա մի քանի օր է տեւելու, եւ ես այդ ընթացքում այստեղ եմ լինելու»,- նշել է Բեքչյանը։
