Խորհրդարանական ընտրություններին մի՛ ենթարկվեք ձեր ձայնը վաճառելու գայթակղությանը: Մարտի 16-ին լրագրողների հետ զրույցում այս մասին հայտարարեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին՝ «Ելք» ընդդիմադիր դաշինքի ներկայացուցիչների հետ հանդիպումից հետո:
Դիվանագետը հայ ընտրողներին 5 ուղերձ հղեց: «Մեսիջ առաջին՝ գնացեք եւ քվեարկեք: Գիտեմ, որ շատերը վստահություն չունեն, որ իրենց ձայնը հաշվի կառնվի: Աչքի առաջ ունեն անցյալի վատ փորձը: Բայց ես ցանկանում եմ հրապարակավ ասել՝ այս անգամ մենք ամեն ինչ կանենք, որ ձեր ձայնը հաշվի առնվի: Երկրորդ մեսիջ՝ հավատացեք, որ ձեր ձայնը գաղտնի կմնա: Ընտրողների նույնականացումը եւ տեսախցիկները չեն բացահայտում ձեր ընտրությունը: Ձեր ընտրությունը գաղտնի կմնա: Այս տեխնոլոգիաները ձեր ձայնը գաղտնի կդարձնեն»,- ընդգծեց Սվիտալսկին՝ նշելով երրորդ մեսիջը՝ մի՛ գայթակղվեք ձեր ձայնը վաճառելով: «Որոշ մարդիկ ձեզ կարող են ձեր ձայնի դիմաց փող առաջարկել, ծառայություններ, խոստումներ տալ: Ես մեծ հույս ունեմ, որ հայ ընտրողները նման գայթակղությունից զերծ կմնան, քանի որ մեկը մեկին համարժեք չէ՝ վճռվում է ձեր ապագան, եւ ոչ մի փող չարժե ձեր ձայնը վաճառելուն: Մի՛ վաճառեք ձեր ձայնը: Չորրորդ մեսիջ՝ համարձակ եղեք: Թույլ մի տվեք, որ ձեզ վախեցնեն: Դուք կարող եք սպառնալիքների ենթարկվել, դուք կարող եք նույնիսկ բռնության ենթարկվել: Բարեբախտաբար, միչեւ հիմա բռնության դեպքերը եզակի են եղել: Խիզախ եղեք, ավելի խելացի եղեք նրանցից, ովքեր հավատում են, որ ձեզ կարող են մանիպուլյացիայի ենթարկել: Այս ընտրություններով կորոշվի ձեր ապագան»,- նշեց Պյոտր Սվիտալսկին:
ԵՄ պատվիրակության ղեկավարի հինգերորդ մեսիջը հետեւյալն էր. «Եթե ինչ-որ սխալ բան եք տեսնում, մի՛ վախեցեք այդ մասին ասել: Դիմեք իրավապահ մարմիններին, նույնիսկ եթե չեք հավատում, որ նրանք վճռական գործողությունների կդիմեն: Դա նրանց պարտականությունն է: Եվ ես գիտեմ՝ վստահություն ներշնչելու համար նրանք պետք է արձագանքեն խախտումների բոլոր դեպքերին: Այդ խախտումների մասին հայտնեք միջազգային դիտորդներին եւ տեղական դիտորդներին: Հայաստանն այս ընտրություններին կընդունի աննախադեպ թվով դիտորդների: Ընտրական յուրաքանչյուր տեղամասում դիտորդներ կլինեն»:».