Քաղաքացիական հասարակությանը ներկայացնող որոշ միջազգային կազմակերպություններ Հայաստանի խորհրդարանական ընտրություններում դիտորդական առաքելություն իրականացելու հրավեր չեն ստացել. դա վատ է։ Այս մասին մարտի 16-ին լրագրողների հետ հանդիպման ժամանակ հայտարարել է Հայաստանում Եվրոպական Միության պատվիրակության ղեկավար Պյոտր Սվիտալսկին՝ «Ելք» ընդդիմադիր դաշինքի ներկայացուցիչների հետ հանդիպումից հետո։ 

Նրա խոսքով՝ նրանք Հայաստանի Կենտրոնական ընտրական հանձնաժողովի հետ երկխոսություն են իրականացրել այն փաստի վերաբերյալ, որ որոշ միջազգային կազմակերպություններ ընտրություններին դիտորդական առաքելություն իրականացնելու հրավեր չեն ստացել։ «Դրանք քաղաքացիական հասարակությունը ներկայացնող եվրոպական կազմակերպություններ են։ Նրանք եվրոպացի հարկատուներ են, որոնք սեփական գրպանից են փողեր վճարում՝ Հայաստանին օգնելու համար։ Այժմ ստացվում է՝ նրանք չեն կարող գալ եւ ընտրություններին հետեւել։ Դուք կարծում եք՝ դա լա՞վ է։ Ո՜չ», - ընդգծել է Սվիտալսկին։