Ընտրությունների լավ անցկացումը Հայաստանի եւ ԵՄ-ի միջեւ համագործակցության նոր հնարավորություններ կբացի: Եվրամիությունը աջակցության մեծացում է դիտարկում ֆինանսական միջոցների եւ ծրագրերի տեսակետից: Մարտի 16-ին լրագրողների հետ զրույցում այս մասին ասաց Հայաստանում Եվրամիության պատվիրակության ղեկավար, դեսպան Պյոտր Սվիտալսկին՝ ընդդիմադիր «Ելք» դաշինքի ներկայացուցիչների հետ հանդիպումից հետո:
Նրա խոսքով՝ մինչեւ Հայաստանի եւ ԵՄ-ի միջեւ շրջանակային համաձայնագրի ստորագրումը պետք է տեխնիկական աշխատանք կատարվի, որը ժամանակ է պահանջում: «Դա կարող է ամիսներ տեւել: Ես հիմա չեմ կարող համաձայնագրի ստորագրման հստակ ամսաթիվ նշել, բայց անցյալի փորձը ցույց է տալիս, որ բանակցությունների ավարտից հետո մինչեւ ստորագրման ժամանակահատվածը կարող է շատ երկար տեւել: Ղազախստանի դեպքում այս ժամանակահատվածը մեկ տարուց ավելի է տեւել»,- նշեց Սվիտալսկին:
ԵՄ պատվիրակության ղեկավարի հավաստիացմամբ՝ համաձայնագրի ստորագրումը ապրիլին անցկացվող խորհրդարանական ընտրությունների հետ կապ չունի: «Բայց, իհարկե, համաձայնագրի իրականացման մթնոլորտը կախված կլինի, թե Հայաստանում ինչպես են ընթանում ժողովրդավարական գործընթացները եւ տնտեսական բարեփոխումները: Որքան Հայաստանում եվրոպական բարեփոխումները, ժողովրդավարությունը եւ տնտեսական ազատությունները շատ լինեն, այնքան մեր համագործակցության միջավայրը լավը կլինի»,- ընդգծեց Պյոտր Սվիտալսկին:
