«Հաց բերողը» մահացել է: Երեկ երեկոյան Արթուր Սարգսյանը հիվանդանոց է տեղափոխվել եւ վիրահատությունից ժամեր անց, այդպես էլ գիտակցության չգալով, մահացել է: Մահվան պատճառը սիրտ-անոթային անբավարարությունն է եղել: Սարգսյանին մեղադրում էին «Սասնա ծռերին» օժանդակելու մեջ: Երեւանում ՊՊԾ գնդի գրավման 9-րդ օրը նա ճեղքել է ոստիկանական շղթան եւ սնունդ հասցրել «Սասնա ծռերին»: Ամանորի նախաշեմին ազատ արձակված Սարգսյանին փետրվարի 9-ին կրկին կալանավորեցին: Մոտ մեկ ամիս հացադուլի մեջ գտնվող Արթուր Սարգսյանը պահանջում էր փոխել իր խափանման միջոց կալանքը: Ազատ արձակվելուց հետո նա հիվանդանոց էր տեղափոխվել, օրերս անց, սակայն, ինքնակամ հեռացել:
Արթուր Սարգսյանի հիշատակին Երեւանում բողոքի երթ են կազմակերպել: Ազատության հրապարակում կարճատեւ հանրահավաքից հետո հավաքվածները շարժվել են դեպի Մաշտոցի պողոտա եւ փորձել փակել ճանապարհը: Ակտիվիստներից մի քանիսը նստել են գետնին, ինչի հետեւանքով երթեւեկությունը կաթվածահար է եղել: Ոստիկանները ուժով հեռացրել են ցուցարարներին ու բացել ճանապարհը:
Հայաստանում Եվրամիության դեսպան Պյոտր Սվիտալսկին հինգ ուղերձ է հղել հայաստանցի ընտրողներին: Բոլորն էլ վերաբերում են առաջիկա խորհրդարանական ընտրություններին: Սվիտալսկին համոզմունք է հայտնել, որ այս ամենին հետեւելու դեպքում ապրիլի 2-ի ընտրությունները նախորդներից ավելի լավ կանցկացվեն եւ մեկ քայլ առաջ կլինեն Հայաստանի համար:
Անդրադառնալով նախընտրական քարոզչության ժամանակ արձանագրված միջադեպերին, Սվիտալսկին ասել է, որ տեղյակ են Ջրառատի դեպքերին, բայց դա առանձին դեպք են համարում եւ չի կարելի խոսել զանգվածային բռնությունների մասին: Այնուամենայնիվ, նա իրավապահներին կոչ է արել կանխել ցանկացած նման դեպք, քանի որ բռնությունը բռնություն է ծնում եւ կարող է ձնագնդու էֆեկտով տարածվել:
Դիվանագետը հիշեցրել է, որ Եվրամիությունը նախկինում երբեք նման մեծ ուշադրություն չի դարձրել որեւէ երկրում անցկացվող ընտրություններին: Սակայն, անկախ նրանից, թե որքանով արդար ու թափանցիկ կլինեն ապրիլի 2-ի ընտրությունները, դա որեւէ կերպ չի կարող ազդել Հայաստան-Եվրամիություն Շրջանակային համաձայնագրի ստորագրման վրա: Չնայած դրան՝ Եվրամիությունն ուշադիր հետեւելու է ընտրական գործընթացին եւ անդրադառնալու է արձանագրած բոլոր թերություններին: Դրանցից մեկի մասին այսօր նա արդեն խոսել է:
Ֆրանսիայում ահաբեկչություն է իրականացվել: Արժույթի միջազգային հիմնադրամի փարիզյան գրասենյակում ծրարը բացելիս պայթյուն է տեղի ունեցել: Մեկ մարդ է տուժել: Ֆրանսուա Օլանդը կատարվածն ահաբեկչություն է որակել: Նա նաեւ հայտարարել է, որ երկրում սահմանված արտակարգ դրության ռեժիմը կպահպանվի առնվազն մինչեւ հուլիսի 14-ը:
Իսկ Ֆրանսիայի մեկ այլ՝ Գրաս քաղաքում վարժարաններից մեկում հրաձգության հետեւանքով մեկ մարդ է զոհվել, շուրջ մեկ տասնյակ վիրավոր կա: Հրաձգությանը մասնակցելու կասկածքով մեկ ձերբակալված կա, եւս մեկ կասկածյալի որոնում են:
Մեծ Բրիտանիայի թագուհին ստորագրել է Եվրամիության կազմից թագավորության դուրս գալու ընթացակարգ սկսելու մասին օրինագիծը: Ավելի վաղ բրիտանական խորհրդարանի երկու պալատներն էլ հավանության էին արժանացվել Լիսաբոնի պայմանագրի 50-րդ հոդվածը գործի դնելու մասին օրինագիծը, որը կառույցի անդամ երկրներին իրավունք է տալիս լքել Եվրամիությունը։ Արդեն մինչեւ մարտի վերջ վարչապետը կտա ծրագրի մեկնարկը: Նշենք, որ այս փաստաթուղթը սկսել էին «պինգ պոնգ» կոչել, քանի որ մինչեւ գործարկումն այն բազմաթիվ փուլերով պետք է հաստատվեր:
Կառավարության այսօրվա նիստում վարչապետը հանձնարարել է ստուգել Հայաստանում իրացվող նավթամթերքի որակը: Բացթողումների պատճառով սպառողները տուժում են: Սուրեն Կարայանը պարզաբանել է, որ հանձնարարականը կապված է վառելիքի որակի պատճառով Արցախում առաջացած խնդիրների հետ: Շաբաթներ առաջ Կարեն Կարապետյանը խորհրդարանում հայտարարել էր, որ ապրիլյան պատերազմի ժամանակ ռազմական տեխնիկան լիցքավորելիս խնդիրներ են եղել:
Վարչապետի մեկ այլ հանձնարարական էլ վերաբերել է բանկային գրավների վաճառքի ժամկետների սահմանափակմանը: Բանն այն է, որ օրենսդրությունն այժմ պարտատերի անվճարունակության պարագայում գրավադրված գույքի վաճառքի հստակ ժամկետներ չի սահմանում: Եվ որոշ դեպքերում բանկերը երկար ժամանակ չեն վաճառում գրավադրված գույքը, սպասում են այնքան, որ տուգանքների չափն ավելի մեծ լինի եւ գրավադրված գույքի վաճառքից հետո վարկառուին ոչինչ չմնա: Հիմա պետք է գրավադրված գույքի իրացման ժամկետներ մշակվեն, եւ ժամկետի խախտման դեպքում չվճարման համար տուգանքները պետք է սառեցվեն:
Կառավարության շենքի առջեւ այսօր բազմամարդ էր: Վարչապետի հետ հանդիպելու ակնկալիքով Հանրապետության հրապարակ էր եկել հաշմանդամ ազատամարտիկ Գագիկ Հարությունյանի 16 հոգանոց ընտանիքը: Նրանք սպառնում էին նստացույց սկսել, եթե կառավարությունը չվերականգնի իրենց հասանելիք ֆինանսական աջակցությունը: Ընտանիքում 12 երեխա կա, 5-ը՝ անչափահաս: Նախկինում 250 հազար դրամ աջակցություն են ստացել պաշտպանության նախարարությունից, սակայն հունվարից այլեւս չեն ստանում գումարը: Վարչապետին, ինչպես նաեւ կառավարությունից որեւէ մեկին հանդիպել այդպես էլ չեն կարողացել:
«Գլենդել հիլզ» ընկերությունից տուժած մի քանի տասնյակ բնակիչներ էլ Տիգրան Մեծի պողոտան էին փակել: Հիմա կառավարությունից պատասխան են պահանջում, թե երբ են ստանալու իրենց հասանելիք բնակարանները: Ոստիկանները ցուցարարներին ուժով հեռացրել են ճանապարհի երթեւեկելի մասից: Հիշեցնենք, որ 2004 թվականին Երեւանում գերակա շահ ճանաչված տարածքների քանդված տների բնակիչների հետ կառուցապատող «Գլենդել Հիլզ»-ը պայմանագիր է կնքել, բայց մինչեւ հիմա քչերն են փոխհատուցում ստացել:
Մարտի 16-ին դոլարը շարունակել է զիջել դիրքերը, իսկ եվրոն շուրջ 4 դրամով թանկացել է: Արդյունքում դոլարի փոխարժեքն այսօր կազմել է 483 դրամ, եվրոյինը՝ 518, ռուբլունը՝ 8 դրամ 34 լումա, ֆունտինը՝ 592 դրամ:
Մարտի 17-ի գիշերը հանրապետության շրջանների մեծ մասում ժամանակ առ ժամանակ տեղումներ են սպասվում, լեռնային գոտիներում՝ կրկին թաց ձյուն եւ ձնախառն անձրեւ: Ցերեկը տեղումներ չեն լինի: Օդի ջերմաստիճանն էապես չի փոխվի: Երեւանում նույնպես գիշերը տեղումներ կլինեն: Մայրաքաղաքում գիշերը կդիտվի 0+2, ցերեկը՝ +12+14 աստիճան տաքություն:
