Հայաստանի տնտեսությունը կաճի ԵՏՄ շրջանակում, թե ոչ՝ կախված է նրանից, թե որքանով խելամիտ մենք կլինենք։ Այս մասին մարտի 16-ին Երեւանի Արաբկիր վարչական շրջանում ընտրողների հետ հանդիպման ժամանակ ասել է ՀՀԿ փոխնախագահ, վարչապետ Կարեն Կարապետյանը։
Նրա խոսքով, շատերն ասում են, որ Հայաստանը տուժել է ԵՏՄ-ին անդամակցելուց։ «Շատերն ասում են, որ ԵՏՄ-ին անդամակցելուց հետո մենք քիչ ուշադրություն ենք հատկացնում Եվրոպային։ Ինչպե՞ս եմ ես վերաբերվում ԵՏՄ-ին։ ԵՏՄ-ն ավելի քան 180 մլն բնակչությամբ 5 երկրների ակումբ է։ Այդ ակումբի անդամները պայմանավորվել են խաղի կանոնների մասին, օրինակ սահմաններն անցնելիս։ Կշահենք մենք դրանից, թե ոչ, կարծում եմ՝ մեզնից է կախված։ Ինչո՞ւ է մեզ հետաքրքիր այդ շուկան։ Մենք չպետք է պատրանքներ ունենանք»,- շեշտել է Կարեն Կարապետյանը։ Նա պարզաբանել է, որ այսօր Հայաստանի տնտեսական ներուժը հիմնականում ուղղված է այն երկրների շուկաներին, որոնց կողքին մենք ապրել ենք բավականին երկար տարիներ։
«Արդյո՞ք ԵՏՄ-ն սահմանափակում է մեր աշխատանքը մյուս շուկաներում։ Ունենք արդյո՞ք մենք ապրանքներ, որոնք կարող ենք արտահանել Եվրոպա, լինելով ԵՏ Մ մասնակից երկիր ու չենք անում դա։ Կարծում եմ, որ ոչ։ Արդյո՞ք դա սահմանափակում է մեր տարածաշրջանային համագործակցությունը։ Ոչ։ Ես իմ վրացի գործընկերոջը, երկկողմանի հարաբերություններից բացի, առաջարկել եմ ստեղծել այսպես կոչված վերպետական մակարդակ, որտեղ մենք կկարողանանք համագործակցել։ Մենք առաջարկել ենք նրանց օգտագործել Հայաստանը որպես հարթակ»,- ասել է Կարեն Կարապետյանը։ Եթե կա վրացական կապիտալ, որը ուզում է մտնել ԵՏՄ, հավելել է նա, թող ձեռնարկություն բացեն Հայաստանում ու օգտվեն այդ խմբի անդամների հետ առեւտրի հնարավորություններից։