Գեղարքունիքի մարզում աշխատանքային այցով գտնվող վարչապետ Կարեն Կարապետյանը այսօր՝ մարտի 17-ին, հանձնարարել է Սեւանի բժշկական կենտրոնի վերանորոգման աշխատանքներն ավարտել մինչեւ այս տարվա վերջ: NEWS.am-ի թղթակիցը Սեւան քաղաքից հաղորդում է, որ Կարեն Կարապետյանը Գեղարքունիքի մարզպետ Ռաֆիկ Գրիգորյանի հետ շրջել է Սեւանի բժշկական կենտրոնում, ծանոթացել ընթացող աշխատանքներին: Մարզպետի դիտարկմանը, թե չնայած պայմանագրով նախատեսվում է աշխատանքներն ավարտել մինչեւ 2018թ. վերջ, շինարարական աշխատանքներն իրականացնող ընկերությունը խոստացել է աշխատանքներն ավարտին հասցնել այս տարվա վերջին: Մարզպետի դիտարկումից հետո Կարեն Կարապետյանն իր մոտ է հրավիրել շինարարական ընկերության պատասխանատուին եւ հանձնարարական տվել:
«Ընդամենը 1600 քառակուսի մետր է, ի՞նչն է խանգարում, որ շինարարական աշխատանքները ավարտեք մինչեւ այս տարվա վերջ ու դուք պետք է ավարտեք, որովհետեւ մենք մեր պարտավորությունները հստակ կատարել ենք»,-ասել է վարչապետը:
Վարչապետ Կարեն Կարապետյանը հանձնարարել է նաեւ բժշկական կենտրոնի տնօրեն նշանակել, Ռազմիկ Գրիգորյանը հավաստիացրել է, որ այդ հարցը լուծված է:
Նշենք, որ Սեւանի ծննդատունը բավականին հեռու է եղել Սեւանի բժշկական կենտրոնից: Այդ պատճառով որոշում է կայացվել դարձնել մեկ համալիր կառույց:
