Վարկերի տոկոսադրույքները նվազեցնելու մասին քաղաքական կուսակցությունների խոստումներն իրատեսական չեն: Մարտի 18-ին «Այլընտրանք» վերլուծական կենտրոնի կազմակերպած կլոր սեղանի ընթացքում այս մասին հայտարարեց Հայաստանի բանկերի միության գործադիր տնօրեն Սեյրան Սարգսյանը:
Պատգամավորության թեկնածուները խոստանում են 3-4%-ով վարկեր ապահովել: Բայց հասկանալի չէ, թե որտեղից են նման էժան ռեսուրսներ վերցնելու, եթե միջազգային կազմակերպություններից 6-7%-ով են գումար վերցնում: Եթե դրան ավելացնենք նաեւ տեղական բանկերի մարժան՝ առանց հաշվի առնելու գործառնական ծախսերը, առնվազն 9-10% կստացվի:
Նրա խոսքով՝ 2016 թվականին բանկային համակարգի եկամտաբերությունը տոկոսային գործարքներից կազմել է 3.1%, ակտիվների վերադարձի գծով՝ 0.5%: Երեք բանկեր տարին վնասով են փակել:
Կառավարությունը սուբսիդավորում է ֆերմերային վարկերը, բայց դրա համար փոքր գումար է հատկացվում եւ ամենեւին ոչ բոլորին է բավականացնում: Հայաստանում գյուղատնտեսական վարկերի պորտֆելը կազմում է շուրջ 312 մլն դոլար: Իսկ ֆերմերների սուբսիդավորման համար 2016-2017 թվականներին պետբյուջեից հատկացվել է ընդամենը 1 մլրդ 163 մլն դրամ (2.4 մլն դոլար - խմբ.):
