«Մենք սիմպատիչնի տղա չենք ընտրում, մենք ընտրում ենք իշխանություն»: Այսկերպ արձագանքեց «Ելք» դաշինքի ցուցակը գլխավորող Էդմոն Մարուքյանը վարչապետ Կարեն Կարապետյանի մասին ակնարկին:
Այսօր՝ մարտի 18-ին Վանաձորի վետերանների հավաքատեղում անցկացվող հանդիպման ընթացքում ԱԺ պատգամավոր Էդմոն Մարուքյանն անդրադաձավ վարչապետ Կարեն Կարապետյանի գործունեությանը:
«Այդ մարդը Երեւանի քաղաքապետ է եղել, հրաժարական է տվել, մինչեւ հիմա ոչ ոք չգիտի ինչի է հրաժարական տվել: Գնացել է Գազպրոմում աշխատել, երբ Հայաստանի գազպրոմի տնօրենն է եղել, Հայաստանը գազի միլիարդավոր պարտքեր է կուտակել, որի դիմաց մեր երկիրը անընդհատ գույքով է փակվել, ամբողջ գազային համակարգը տվել է Ռուսաստանին, բայց ասում են՝ նա ընտիր մենեջեր է»,- նշեց Մարուքյանը՝ հավելելով. «Հիմի էդ մարդու նկարով ձայն են հավաքում, որ ի՞նչ լինի»:
«Սիմպատիչնի տղա է»,-նկատեց ներկաներից մեկը:
«Ժողովուրդ ջան, մենք սիմպատիչնի տղա չենք ընտրում, մեր դաշինքում էլ կան բազմաթիվ սիմպատիչնի տղերք: Մենք ընտրում ենք իշխանություն»,- հակադարձեց Մարուքյանը:
Հրաժեշտին վետերանները Էդմոն Մարուքյանից խնդրեցին նրա քարոզչական պաստառը, հավաքատեղի պատին փակցնելու համար: Նրանք պատգամավորին հորդորեցին էլի այցելել, բացակա վետերանների հետ եւս հանդիպելու համար:
