Նախկինում Հայաստանը հզոր արդյունաբերական երկիր էր, որն արտադրում ու արտահանում էր տարբեր արտադրանքներ: Այսօր Հայաստանը ներկրող երկիր է դարձել, իսկ գործող կառավարությունը վերջին տարիներին ոչինչ չի արել` տեղական արտադրանքին նպաստելու համար, որը կարող էր փոխարինել ներկրվողին: Այս մասին այսօր` մարտի 19-ին, Էջմիածին քաղաքում ընտրողների հետ հանդիպման ժամանակ, ասել է Միացյալ պրոգրեսիվ կոմունիստական կուսակցության նախագահ Վազգեն Սաֆարյանը:
Նրա խոսքով` անցյալ տարի Հայաստանը 3.2 մլրդ դոլարի ապրանք է ներկրել, իսկ արտահանել` ընդամենը 1.5 մլրդ-ի` երկու անգամ քիչ: 17 տարվա ընթացքում երկիրը 47 մլրդ դոլարի ապրանք է ներկրել, իսկ արտահանել` 17 մլրդ-ի, այսինքն՝ 30 մլրդ դոլար երկրից դուրս է գնացել։
Բացի այդ, երկրում գրեթե չեն մնացել խոշոր գործարաններ ու ձեռնարկություններ, որոնք կկարողանային տեղական արտադրանք արտադրել` չնայած որ ԽՍՀՄ-ի օրոք դրանք ավելի քան 700-ն էին: Օրինակ` նախկինում, Սաֆարյանի խոսքով` Հայաստանում աշխատել են այնպիսի ձեռնարկույթուններ` ինչպես «Հայէլեկտրոմեքենան», որը 14000 աշխատատեղ էր ապահովում, «Նաիրիտ»-ը, Վանաձորի քիմպրոմը: Այսօր այդ բոլոր մարդիկ չեն աշխատում: Կոմունիստների կարծիքով` «Նաիրիտ»-ը նորից կարող էր աշխատել, եթե միավորեին Երեւանի ՀԷԿ-ի հետ, իսկ որպես վառելիք գործածվեր իրանական գազը: Իսկ եթե աշխատեր Վանաձորի քիմպրոմը, Հայաստանի բնակչությանը կարելի էր ապահովել տեղական արտադրության պարարտանյութերով: Դրա փոխարեն Հայաստանն այսօր Վրաստանից ներկրում է 32 000 տոննա ազոտային պարարտանյութեր: