Կիեւում հայկական Սուրբ Աստվածածին եկեղեցու պատմությունը նոր հետազոտությունների կարիք ունի, հաղորդում է AnalitikaUA.net-ը: Այս մասին հայտնել է Ուկրաինայի հայերի միության պատմամշակութային ժառանգության հարցերով կոմիտեի ղեկավար Դավիթ Դավթյանը:
«Կուտակված փաստացի նյութը թույլ է տալիս պնդել, որ Կիեւի հայկական տաճարներից մեկը գոյություն է ունեցել XIV դարի վերջին, որը, հնարավոր է վերանորոգվել XV դարում: 1530-1580-ին եկեղեցու կործանման հետեւանքով հայերը պատարագ են մատուցել Սուրբ Սոֆիայի տաճարի ներքին պատկերասրահում: Համաձայն պահպանված վկայությունների` XVI վերջին եւ XVII դարի սկզբին քաղաքում նորից հայկական եկեղեցի էր գործում` հայտնի որպես Սուրբ Աստվածածնի եկեղեցի, որը գոյություն է ունեցել մինչեւ 1680-ականները»,-ասել է պատմաբանը:
Ինչպես նշել է Դավթյանը` այսօր շատ կարեւոր է ուսումնասիրել Կիեւի հայ եկեղեցու ամբողջական պատմությունը: