2016 թվականին Հայաստան այցելած իրանցի զբոսաշրջիկների թիվը կազմել է 188 հազար 851 մարդ: Մարտի 20-ին՝ լրագրողների հետ հանդիպման ժամանակ այս մասին հայտարարեց Տուրիզմի պետական կոմիտեի նախագահ Զարմինե Զեյթունցյանը:
Նրա խոսքով՝ 2015-ին Հայաստան էր այցելել 144 հազար 160 իրանցի զբոսաշրջիկ: «2016-ին Հայաստանում գրանցվել է տուրիզմի աճ, որում 31 տոկոսը իրանցի զբոսաշրջիկներին է բաժին ընկնում»,- ընդգծեց Զեյթունցյանը՝ շարունակելով, որ այս տարի քայլեր են ձեռնարկվում իրանցի զբոսաշրջիկների այցելությունների աճ ապահովելու համար: «Քայլեր են ձեռնարկվել, որպեսզի Հայաստանը զբոսաշրջիկների համար ավելի գրավիչ դառնա: Առաջին՝ armeniatravel.am կայքը տեղեկություն է ներկայացնում Հայաստանում Նովրուզի տոնի հետ կապված միջոցառումների անցկացման մասին: Բացվել է շուրջօրյա գործող թեժ գիծ, որի հեռախոսահամարները կարելի է տեսնել Մեղրիից մինչեւ Երեւան ճանապարհին տեղադրված 7 ցուցավահանակներին: Թեժ գծին կարելի է դիմել պարսկերենով: Դրանից զատ, նույն վահանակների վրա նշված են մոտակա տեսարժան վայրերի մասին տեղեկություններ, որոնք զբոսաշրջիկները կարող են այցելել»,- նշեց Զարմինե Զեյթունցյանը:
