Հայաստանի Հանրապետական կուսակցության ներկայացուցիչները միմյանց դեմ չեն պայքարում: Մարտի 20-ին՝ լրագրողների հետ հանդիպման ժամանակ այս մասին հայտարարեց ՀՀԿ-ից պատգամավորի թեկնածու Սուքիաս Ավետիսյանը:
Անդրադառնալով նախընտրական միջադեպերին, որոնց պարտադիր մասնակցում է ՀՀԿ-ի այս կամ այն ներկայացուցիչը, Ավետիսյանը նշեց. «Մեր շարքերում, բնականաբար, մրցակցություն կա, բայց դա այն նպատակով է, որ կարողանան մեծաթիվ ընտրողների հետ հանդիպել եւ որքան հնարավոր է շատ ձայն ստանալ: Ցավոք, ընտրությունների ժամանակ այնպես է պատահում, որ որոշ մարդիկ միմյանց հետ խնդիրներ ունեն: Բայց առանձին մարդկանց խնդիրները ընտրությունների հետ մի կապեք: Նման միջադեպերին ես շատ վատ եմ վերաբերվում»:
Թեկնածուն այնուհետեւ շարունակեց, որ ամենակարեւորն այն է, որ ընտրություններից հետո որեւէ քաղաքական գործիչ կամ դիտորդ չլինի, որը կասի, թե դրանք խախտումներով են անցել: