Հայաստանն առաջընթաց է արձանագրել մարդկանց վաճառքը կանխելու եւ դրա դեմ պայքարելու օրենսդրության մեջ։ Այս մասին ասվում է մարդկանց վաճառքի դեմ պայքարի Եվրոպայի խորհրդի փորձագետների խմբի զեկույցում։
Նոր զեկույցը վերաբերվում է 2012-2016-ի դեկտեմբերն ընկած ժամանակահատվածին։ Հայաստանը նախկինի պես մնում է մարդկանց վաճառքին զոհ դարձող մարդկանց երկիր։ Վերոնշյալ շրջանում մոտ 70 զոհ է հայտնաբերվել, նրանք հիմնականում (32) կանայք են։ Նրանց հետեւում են տղամարդիկ (30) եւ երեխաները (17) ։ Զոհերի մեծամասնությունը արտասահմանում շահագործվող Հայաստանի քաղաքացիներ՝ հիմնականում ԱՄԷ-ում, Թուրքիայում եւ Ռուսաստանում։ 2014-ին հայտնի է դարձել, որ Չինաստանի 4 քաղաքացիներ Հայաստանում վաճառքի առարկա են դարձել։
Այնուամենայնիվ, Եվրոպայի խորհրդի փորձագետների խումբը ՀՀ իշխանություններին կոչ է անում առավել արդյունավետորեն կանխել աշխատուժի շահագործման նպատակով մարդկանց վաճառքը՝ այդ թվում աշխատանքային գործակալությունների մոնիթորինգի բարելավման միջոցով։
Հայաստանի իշխանությունները նաեւ պետք է ուշադություն դարձնեն խոցելի իրադրության մեջ հայտնված երեխաներին։ Հատկապես պետք է ուշադրություն դարձնել գյուղական վայրերում երեխաների աշխատանքային շահագործմանը, ինչպես նաեւ եզդի աղջիկ երեխաներին, որոնց սպառնում է պատվազրկումն ու թրաֆիքինգը՝ կապված վաղաժամ ամուսնության հետ։
Թրաֆինգինգի զոհերին պետք է երաշխավորվի անվտանգ ապրելակերպ, ժամանակակից բուժօգնություն եւ սոցիալական վերաինտեգրման պրոֆեսիոնալ նախապատրաստվածություն։
