Հայաստանի նախագահ Սերժ Սարգսյանն այսօր՝ մարտի 20-ին այցելել է «Ալեքս տեքստիլ» ընկերություն:
Նախագահը շրջել է ընկերության արտադրամասերում, ծանոթացել կատարված ներդրումներին, արտադրական հզորությունների մեծացման, ժամանակակից սարքավորումներով նոր արտադրամասերի գործարկման ուղղությամբ վերջին տարիներին իրականացված աշխատանքներին, արտահանման ծավալներին եւ ընկերության զարգացման ծրագրերին:
2015 թվականից գործունեությունը սկսած գուլպաների եւ հագուստի արտադրությամբ զբաղվող «Ալեքս տեքստիլ»-ը, լինելով Հայաստանի թեթեւ արդյունաբերության ոլորտի առաջատար ընկերություններից մեկը, ներկայում 500 աշխատակից ունի, իսկ արտադրամասի գործունեության ծավալների ընդլայնման արդյունքում, պատասխանատուների հավաստմամբ, աշխատատեղերի թիվը կհասցվի 2000-ի:
Սերժ Սարգսյանին ներկայացրել են, որ 2017 թվականին ընկերության կողմից արդեն իսկ բացված նոր կարի արտադրամասում ներգրավված է շուրջ 300 աշխատատեղ: Ընթացիկ տարում ընկերությունը նախատեսում է գործարկել կտորի, գործված հագուստի եւ տնային տեքստիլի արտադրություններ` ստեղծելով եւս շուրջ 600 նոր աշխատատեղ: