Քաջարանում լուրջ վախի մթնոլորտ կար: Այս մասին, այսօր՝ մարտի 20-ին, Աբովյանում «Ելք» դաշինքի քարոզարշավի ժամանակ NEWS.am-ի թղթակցի հետ զրույցում նշել է դաշինքի ցուցակի երկրորդ հորիզոնականը զբաղեցնող, «Հանրապետություն» կուսակցության առաջնորդ Արամ Զ. Սարգսյանը՝ ով քարոզաշավ է անցրացրել Սյունիքի մարզում:
Նա նշեց, որ մարզերում իրենց քարոզարշավը շատ հետաքրքիր է անցնում. «Ես կարծում էի մարդկանց «Ելք» դաշինքի ծանոթացնելու հետ կապված խնդիր կա, բայց չկար. մարդիկ շատ լավ էլ տեղյակ էին մեր դաշինքի մասին: Թվում էր, թե դիտորդներ ունենալու խնդրի առաջ կկանգնեինք, բայց օրինակ Արարատի մարզում այդ խնդիրը շատ արագ լուծվեց: Սյունիք-Զանգեզուրում նոր մարզպետից համատարած բողոքում էին: Սա այն դեպքն էր, որ սյունեցիները նախկին մարզպետին՝ Սուրիկ Խաչատրյանին, ավելի լավն են համարում, քան նոր մարզպետին: Քաջարանում լուրջ վախի մթնոլորտ կար, բայց վախի մթնոլորտ չնկատեցի Կապանում, Գորիսում: Օրինակ՝ Քաջարանում մեզ օգնեցին ԵԱՀԿ դիտորդները, հակառակ դեպքում անընդհատ վեճեր էին ստացվում: Քաջարանում մեզ խոստովանեցին, որ վերջին 20 տարիների ընթացքում ոչ մի քաղաքական ուժ երթ չի արել, չի գնացել: Քրեական տարրեր էլ կային Քաջարանում, ժողովուրդը վախեցած էր: Անգամ մեզ մոտենում էին ասում էին՝ զգույշ եղեք, կամ՝ մեզ մի նկարեք, որովհետեւ դուք նկարում գնում եք եւ չգիտեք մեզ ինչ կանեն: Այդ տարածքն ամբողջությամբ գետտո էր: Կարծես՝ Հայաստանի Հանրապետության մաս չլիներ. Ինչ-որ մեկը եկել էր այդտեղ հին սիցիլիական օրենքով դրվածք դրել: Քաջարանն այսպիսին էր»,-նշեց Արամ Սարգսյանը:
Նա վստահություն հայտնեց, որ Սյունիքի մարզում այդ վախը մարդիկ այս ընտրություններում կհաղթահարեն՝ դեմ քվեարկելով իշխանությանը. «Կարծում եմ՝ Սյունիքից կարող ենք լուրջ քվե ունենալ: Շարունակական այսօրինակ քարոզարշավներով, հանրահավաքների վերջին ակորդներով այդ 3-րդ տեղը, որ փորձում են ամրագրել մեզ, այդքան էլ մեր տեղը չի, քանի որ մենք առաջին դաշինքն ենք, մենք ընդդիմություն ենք եւ մենք ուզում ենք առաջինը լինել, դրա հնարավորությունն ունենք»:
