Բաթումի քաղաքային դատարանը քննության ընթացքում նախնական կալանք է սահմանել եւս ինը մարդու նկատմամբ՝ մարտի 12-ին Բաթումիում տեղի ունեցած անկարգությունների գործով։ Դատավարությունը կայացել է նախօրեին, հայտնում է «Նովոստի Վրաստանը» ։

Դատարանի որոշումը առաջացրել է կալանավորվածների հարազատների դժգոհությունը։ Նրանք համարում են, որ մեղադրյալները անմեղ են ու սպառնում են բողոքի ակցիա կազմակերպել ու փակել փողոցները։ Փաստաբանները նույնպես խոստանում են տրամադրել իրենց պաշտպանյալների անմեղության ապացույցները։

Այսօրվա դրությամբ Բաթումիի անկարգությունների գործով մոտ 15 կալանավորված կա։ Դատարանը քննել է ընդամենը 45 մարդու գործ։ Յոթին հնգօրյա վարչական կալանքի են դատապարտել, ոմանց տոււգանել են, մի մասին ազատ են արձակել, ոմանց էլ բանավոր դիտողություն են արել, հետո ազատել։

Հիշեցնենք, որ մարտի 11-ի լույս 12-ի գիշերը Բաթումիում բողոքի ակցիան վերածվել էր անկարգությունների ոստիկանության շենքի մոտ, որի առջեւ հավաքված հազարավոր ցուցարարները պահանջում էին ազատ արձակել մինչ այդ ձերբակալված վեց մարդու, նաեւ աշխատանքից հեռացնել ոստիկանապետին։