Հայաստանի Կոմկուսի ներկայացուցիչները մարտի 20-ին նախընտրական երթ են անցկացրել Երեւանի կենտրոնում։ Նրանք անցորդներին բաժանում էին իրենք բուկլետները ու ծանոթացնում նրանց իրենց հետագա քայլերին՝ խորհրդարան անցնելու դեպքում։
News.am-ի թղթակցի հետ զրույցում Կոմկուսի Կենտրոնական կոմիտեի առաջին քարտուղար, պատգամավորի թեկնածու Տաճատ Սարգսյանը նկատել է «Ընտրողների վերաբերմունքը մեզ այնքան ջերմ է, որ դժվար է դա բառերով արտահայտել։ Մարդիկ երազում են նախկին կարգերին նվերադառնալու մասին, երբ կոմունիստներն էին կառավարում»։
Կոմկուսից պատգամավորի մեկ այլ թեկնածու՝ Մարիամ Շահինյանը, իր հերթին, շեշտել է «Ես վստահությամբ կարող են ասել, որ Հայաստանի Կոմկուսը, անցնելով խորհրդարան, ոչ միայն կներկայացնի իր ծրագրերը, այլեւ ցույց կտա երկրի զարգացման ուղիները։ Քանի որ 70 տարվա ընթացքում Կոմկուսը կուտակել է բավականին մեծ ժառանգություն` սոցիալական առումով։ «Այն ժամանակ անվճար կրթություն էր, անվճար բժշկություն, երիտասարդ ընտանիքներին հերթագրելով բնակարաններ էին բաժանում։ Մենք ասես կամուրջ լինենք անցյալի ու ներկայի ո ւ հաստատ նաեւ ապագայի միջեւ։ Խորհրդային ժառանգությունը, որը մարդիկ զգում էին, դատարկ բառեր չեն, դա գործ է , որը արվել է։ Եվ հիմք ընդունելով այդ լավ ժառանգությունը, որը եղել է, բացառելով բոլոր սխալները, որոնք եղել են, ես կարծում եմ, որ կարելի է ստեղծել սոցիալապես ապահովված երկիր»։