«Օհանյան-Րաֆֆի-Օսկանյան» դաշինքի ներկայացուցիչ, նախկին արտգործնախարար Վարդան Օսկանյանն այսօր՝ մարտի 20-ին, վանաձորցիներին կոչ է արել ապրիլի 2-ին գնալ ընտրության՝ նշելով, որ այդ օրը որոշվելու է հայ ժողովրդի ճակատագիրը հաջորդ տասնամյակների համար:
«Չհավատաք, երբ ասում են՝ չկա ընդդիմություն, այո՛, մենք վատն ենք, բայց մեզանից լավն էլ չկա: Այսօր իսկական, լավ ներկապնակ կա եւ այդ ներկապնակում այս դաշինքը հանդես է գալիս եւ հայտ վերցնում երկիրը կառավարելու»,-ասել է նա:
Վարդան Օսկանյանը նշել է, որ «Օհանյան-Րաֆֆի-Օսկանյան» դաշինքի լիդերների համար պաշտոն ունենալը կարեւոր չէ, նրանք ցանկանում են իշխանության գալ՝ ժողովրդին ծառայելու:
«Րաֆֆի Հովհաննիսյանը, ես եւ Սեյրան Օհանյանը նույնիսկ բարոյական իրավունք չունենք մեր ժողովրդի համար այս կարեւորագույն ժամանակաշրջանում մեզ տրամադրելի չդարձնել ձեզ: Դուք՝ մեր ժողովուրդն, այս տարիների ընթացքում մեր վրա ներդրում եք արել, մենք ծառայել ենք երկրին, պետությանը եւ ստիպված ենք մեր փորձը վերադարձնել մեր ժողովրդին»,-ասել է նա: