Հայաստանում հերքել են Բելառուսի նախագահ Ալեքսանդր Լուկաշենկոյի հայտարարությունը՝ Հայաստանից ժամանած օդանավում ռադիոակտիվ նյութերի առկայության մասին։
Հայաստանի Պետեկամուտների կոմիտեի մամուլի ծառայության պարզաբանման մեջ ասվում է, որ օդանավակայանի մաքսակետում, ինչպես եւ մյուս սահմանային անցակետերում, իրականացվում է պատշաճ վերահսկողություն՝ ռադիոակտիվ նյութերի տարանցումը բացահայտելու ու կանխելու նպատակով։
«Նշված հրապարակման կապակցությամբ, վստահեցնում ենք, որ օդանավակայանում ուղեբեռերն ու ուղեւորները ենթարկվում են պատշաճ հսկողության ու մաքսային լիազորությունների շրջանակում իրականացված միջոցառումների շրջանակում ոչ մի խախտում չի հայտնաբերվել։ Հետեւաբար, խոսք անգամ չի կարող լինել այն մասին, որ իրավախախտման փաստը կարող էր չնկատվել»,- վստահեցրել են հանձնաժողովի մամուլի ծառայությունից։
Մինչդեռ բելառուսական լրատվամիջոցները հայտնել էին ոչ թե ուղեւորների ու ուղեբեռերի, այլ բեռնատար օդանավի մասին։ Իսկ թե հատկապես որ ընկերության ու որ երկրի օդանավի մասին է խոսում Լուկաշենկոն, դեռ անհայտ է։ Նաեւ անհասկանալի է, արդյոք տարանցիկ օդանավերի բեռները ստուգվում են, թե ոչ։
