Պետական համակարգում աշխատելու հարցում երիտասարդների հնարավորությունների սահմանափակումները Հայաստանում արհեստական են։ Այս մասին մարտի 20-ին հայտնել է ՀՀԿ առաջին փոխնախագահ, վարչապետ Կարեն Կարապետյանը՝ Երեւանի Քանաքեռ- Զեյթուն վարչական շրջանում ընտրողների հետ հանդիպման ժամանակ։

Եվ ընդհանրապես, նրա խոսքով, պետական համակարգում կա նոր շունչ, նոր կադրեր ներառելու անհրաժեշտություն։ «Երիտասարդ կադրեր մեզ շատ են պետք, քանի որ չինովնիկների աշխարհում շատ բան է պետք փոխել։ Չինովնիկները սպառնալիք են ներկայացնում հասարակության համար, եթե չեն աջակցում այդ փոփոխությունները»,- նկատել է Կարան ԿԱրապետյանը։

Այն հարցին, որ 35-45 տարեկան կանանց աշխատանքի չեն ընդունում՝ վարչապետը զարմացած պատասխանել է․ «Առաջին անգամ եմ լսում 35-45 տարեկան կանանց համար աշխատանքային սահմանափակումների մասին։ Այսինքն մենք նման օրե՞նք ունենք։ Թե՞ դա կախված է գործատուի ցանկությունից։ Իրականում ես կողմ եմ, որ մենք գործատուին առավելագույն իրավունքներ տրամադրենք իր թիմը հավաքելու հարցում, բայց եթե դա խախտում է մարդու իրավունքները կամ այլ նորմեր, ապա մենք, որպես պետություն, պետք է զսպենք մասնավոր սեկտորի ցանկությունները ու ասենք, որ նա խախտում է օրենքը»։