«Ծառուկյան» դաշինքը բացառում է Հայաստանի հանրապետական կուսակցության հետ որեւէ տեսակի կոալիցիա կազմելը: Այս մասին մարտի 21-ին լրագրողների հետ հանդիպման ժամանակ հայտարարել է «Ծառուկյան» դաշինքից պատգամավորի թեկնածու Միքայել Մելքումյանը` պատասխանելով NEWS.am-ի թղթակից այն հարցին, թե ինչպիսի ուժերի հետ է «Ծառուկյան» դաշինքը հնարավոր համարում համագործակցությունը` խորհրդանական ընտրություններից հետո:
Նրա խոսքով` երկրի զարգացման վերաբերյալ երկու քաղաքական ուժերի ծրագրային մոտեցումները զգալիորեն տարբերվում են: «Մենք վստահ ենք, որ դեպի հաղթանակ ենք գնում: Եթե մենք հաղթենք, եւ կառավարություն ձեւավորելու ինքնուրույն հնարավորություն ունենանք, բնականաբար, կհամագործակցենք նրանց հետ, ովքեր կիսում են մեր մոտեցումները, մեր ծրագրային դրույթները: Մենք դեպի հաղթանակ ենք գնում, բայց քաղաքական մենաշնորհի ձգտմամբ չենք տառապում», - նշել է Մելքումյանը:
Նա հավելել է, որ ընտրություններից հետո համագործակցության ձեւերի մասին դեռեւս վաղ է խոսել: «Այդ մասին կարելի կլինի խոսել ընտրություններից` ապրիլի 3 - 4-ից հետո», - ամփոփել է Միքայել Մելքումյանը: