«Սասնա ծռեր» խմբի անդամ Հովհաննես Հարությունյանը «Նուբարաշեն» ՔԿՀ-ից տեղափոխվել է Վնասվածքաբանության եւ օրթոպեդիայի գիտական կենտրոն: Այս մասին այսօր՝ մարտի 22-ին, NEWS.am-ի հետ զրույցում ասաց Հովհաննեսի շահերի պաշտպան Հայարփի Սարգսյանը: Նա նշեց, որ մարտի 21-ին Հովհաննեսին տեղափոխել են «Աստղիկ» բժշկական կենտրոն, որտեղից էլ՝ Վնասվածքաբանության եւ օրթոպեդիայի գիտական կենտրոն. ««Աստղիկ» ԲԿ-ում հետազոտվելուց հետո վնասվածքաբանության կենտրոն է տեղափոխվել, ես դեռ չեմ այցելել նրան»:
Փաստաբանը նշեց, որ արտերկրից ժամանած բժիշկնրը Հովհաննեսի մոտ կասկածում են ոսկրի վարակ եւ այդ պատճառով էլ նրան տեղափոխվել են քաղաքացիական հիվանդանոց հետազոտման:
«Անընդհատ արտադրություն կար ոտքից եւ արտերկրից ժամանած բժիշկները կասկածում են ոսկրի ինֆեկցիա»,-ասաց նա:
Վնասվածքաբանության եւ օրթոպեդիայի գիտական կենտրոնից NEWS.am-ին տեղեկացրին, որ Հովհաննես Հարությունյանն իրենց մոտ է տեղափոխվել սերտաճած կոտրվածքով, այս պահին նա հետազոտվում է, որից հետո պարզ կլինի, թե ինչ խնդիրներ ունի նա:
Հիշեցնենք, որ Հովհաննես Հարությունյանը ոտքի ծանր վիրավորում էր ստացել ոստիկանության ՊՊԾ գնդի տարածքում, «Էրեբունի» բժշկական կենտրոնում նրա ոտքը մեկ անգամ վիրահատել են:
Հովհաննես Հարությունյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է: