Հայաստանն առայժմ մտադիր չէ ավելացնել Ռուսաստանում գլխավոր հյուպատոսությունների թիվը: Այս մասին մարտի 22-ին Մոսկվա-Երեւան հեռուստակամուրջի ընթացքում հայտարարեց ՌԴ-ում Հայաստանի արտակարգ եւ լիազոր դեսպան Վարդան Թոխատյանը՝ ամփոփելով առաջին մի քանի օրերի աշխատանքը:
Դեսպանի խոսքով՝ ներկայում Ռուսաստանում Հայաստանի 4 գլխավոր հյուպատոսություն է գործում. Մոսկվայում, Դոնի Ռոստովում, Սանկտ Պետերբուրգում եւ Սոչիում:
«Սակայն երկրի մնացյալ տարածքի ընդգրկման խնդիր կա: Օրինակ՝ Հայաստանի շուրջ 2 հազար քաղաքացի է բնակվում Կամչատկայում: 9 ժամ թռիչք է պահանջվում՝ որեւէ տեղեկանք ստանալու համար»,- նշեց դեսպանը՝ հավելելով, որ Հայաստանը դիտարկում է արտագնա հյուպատոսների ինստիտուտի վերականգնման հնարավորությունը:
Դեսպանը նաեւ նշեց, որ մտադիր է ակտիվորեն ճամփորդել ամբողջ Ռուսաստանով, ընդ որում՝ դեռեւս չանցած ճանապարհներով: «Պատվո հյուպատոսների ինստիտուտը գործում է, պետք է ակտիվացնենք այն, զարգացնենք հումանիտար կապերը»,- նշեց դիվանագետը: