Բելգիայի մայրաքաղաք Բրյուսելի հյուսիս-արեւելքում գտնվող «Ֆորե դե Սուան» տեղանքում 32 կեչի են տնկել՝ ի հիշատակ 2016-ի մարտի 22-ին տեղի ունեցած ահաբեկչության 32 զոհերի, հաղորդում է Premiere հեռուստակայանը։
Համաձայն բնական հուշահամալիրի ճարտարապետի մտահղացման՝ շրջանաձեւ տնկված ծառերը խորհրդանշում են մաքրությունն ու անարատությունը, եւ ստեղծվում է տպավորություն, ասես նրանք միմյանց ձեռք են բռնել։ Ծառերը հավերժություն խորհրդանշող շրջանակաձեւ նստարանին են հարում։
2016-ի մարտի 22-ին Բրյուսելի միջազգային օդանավակայանում երկու պայթյուն է որոտացել։ Երրորդը որոտացել է մի փոքր ավելի ուշ՝ Բրյուսելի «Մալբեկ» կայարանում։ Ահաբեկչության արդյունքում 32 մարդ է զոհվել, եւս 300-ը տարբեր ծանրության վնասվածքներ են ստացել։ Հարձակման պատասխանատվությունն իր վրա է վերցրել «Իսլամական պետություն» ահաբեկչական խմբավորումը։
