Հայաստանի կառավարության մեջ պետք է մարդիկ մտնեն, որոնք սեփական բիզնես չունեն, եւ որոնց եղբայրները արտահանման եւ այլ ոլորտներում մենաշնորհ չունեն: Մարտի 22-ին Բյուրականում՝ ընտրողների հետ հանդիպման ժամանակ այս մասին ասաց «Օհանյան-Րաֆֆի-Օսկանյան» դաշինքից պատգամավորի թեկնածու Րաֆֆի Հովհաննիսյանը:
Նրա խոսքով՝ իսկ այսօր Հայաստանում առկա են «ընտանեկան մենաշնորհներ», աղքատության խնդիր, արտագաղթ, իսկ այս ամենի հետեւանքով տնտեսությունն «ազատ չէ»: Հովհաննիսյանի կարծիքով՝ ներկայիս Հայաստանը պետք է վերեւից ներքեւ փոխել, եւ եթե մենք ցանկանում ենք լավ երկիր ունենալ, անհրաժեշտ է առաջին հերթին մենաշնորհների հարցը լուծել:
«Մեր գործող վարչապետը կիրթ եւ հաճելի արտաքինով մարդ է: Նա կարծես նաեւ խելացի մարդ է, աշխարհ տեսած: Նա խոսում է բացթողումների եւ սխալների մասին, եւ դա լավ է: Բայց եթե նա իսկապես անկեղծ է, եթե նա իսկապես ցանկանում է լավ ուղղությամբ փոխել միջինվիճակագրական հայի կյանքը, նա պետք է գնա կուսակցության ժառանգության դեմ, որի անդամն է»,- նշեց Րաֆֆի Հովհաննիսյանը: