2018-ին Որոտանի ՀԷԿ կասկադը կսկսի տուրբինների ու գեներատորների վերանորոգումը։ Այս մասին News.am –ի թղթակցին հայտնել է կասկադի սեփականատեր Contour Global Hydro Cascade ընկերության գլխավոր տնօրեն Արա Հովսեփյանը։
Մինչեւ հունիս կամփոփվեն կապալառուի համար տենդերի արդյունքները։ Մինչեւ տարեվերջ նա կկազմի նախագծային փաստաթղթերը, իսկ հաջորդ տարվա սկզբին կսկսվեն վերանորոգման աշխատանքները։

«Տուրբիններն ու գեներատորները ծրագրի առաջին փուլն են։ Երկրորդ փուլում մենք կարդիականացնենք դրանց էլեկտրամեխանիկական սարքավորումները»,- ասել է Հովսեփյանը։
Կասկադի 4 ջրամբարների պատերի վերանորոգման համար առանձին ծրագիր կկազմի գերմանական Fichtner ընկերությունը։ «Այստեղ մի քիչ ավելի շատ ժամանակ կպահանջվի։ 2018-ին մենք նոր կավարտենք նախագիծը ու կներկայացնենք այն Հանրային ծառայությունների կարգավորման հանձնաժողովին»,- հայտնել է Հովսեփյանը։
Նշենք, որ Countour Global –ը արդեն 140 միլիոնի սինդիկացված վարկ է ներգրավել։  Վարկը կտրամադրեն 4 կազմակերպություններ ՝ HSBC Corporate Trustee Company-ն (HSBC բանկի դուստր ընկերությունը), ՄԻջազգային ֆինանսական կորպորացիան  (IFC), Զարգացող երկրների համար նիդեռլանդական ֆինանսական միությունը (FMO), Ներդրումների ու զարգացման գերմանական միությունը (DEG)։ ՄԻջոցները նախատեսված են լինելու կասկադի վերասարքավորման ու հայկական բանկերում վերցված վարկերը մարելու համար։
Որոտանի ՀԷԿ կասկադը Հայաստանի հիդրոէներգետիկայի ամենահզոր օբյեկտն է (404,2 ՄՎտ)։ 2016-ին այն արտադրել էր երկրում բաշխվող էլեկտրաէներգիայի 16 տոկոսը։
Contour Global Hydro Cascade - -ը ամերիկյան Contour Global կորպորացիայի դուստր ընկերությունն է ։