Շվեդիայի Օրեբրո քաղաքի ոստիկանական բաժանմունքում մահացած Հայաստանի քաղաքացի 32-ամյա Դավիթ Բարսեղյանի իրավահաջորդի ներկայացուցիչ Մարկ Սաֆարյանը դիմել է Շվեդիայի արդարադատության կանցլերին Շվեդիայի Ներքին գործերի նախարարության դեմ քաղաքացիական հայց հարուցելու համար: Այսօր՝ մարտի 23-ին, փաստաբանը նշեց, որ քրեական գործի նախաքննությունից սպասելիքներ չունի եւ հենց այդ պատճառով էլ դիմել է արդարադատության կանցլերին՝ իմանալու, թե իրականում ինչ է տեղի ունեցել, ինչպես է հայ տուրիստը ոստիկանության բաժանմունքում մահացել:
«Քանի որ մենք շատ մեծ սպասելիքներ չունենք քրեական գործի հետ կապված, որոշեցինք քաղաքացիական գործի շրջանակում փորձել պարզաբանել, թե իրականում ինչ է տեղի ունեցել: Որովհետեւ դա միակ ճանապարհն է այս գործից ինֆորմացիա ստանալու:Քաղաքացիական հայց ենք ներկայացրել Շվեդիայի արդարադատության կանցլերին, եթե բավարարի մեր հայցը, կիմանանք մեր բոլոր հարցերի պատասխանը եւ նույնիսկ քրեական գործը կարող ենք ինքներս տանել առաջ, մենք ոստիկանությունից սպասելիքներ չունենք»,-ասաց նա:
Մարկ Սաֆարյանը նշեց, որ, եթե Շվեդիայի արդարադատության կանցլերն իր ներկայացրած հայցը չբավարարի՝ կդիմի այլ ատյաններ:
«Եթե չբավարարեց մեր հայցը՝ գնալու ենք հաջորդ ատյան, որը լինելու է դատարանը, որից հետո էլ ՄԻԵԴ: Մենք հավատում ենք , որ արդարադատության կանցլերը այս գործում շարժ կմտցնի: Այժմ այստեղ աղմուկ է բարձրացել, որ պետության կողմից տուժած մարդը իր ուժերով պետության դեմ է դուրս եկել, Շվեդիայի պատմության մեջ նորություն է եւ այստեղ աղմուկ է բարձրացել, թե ինչպես ենք ռիսկ արել, որ նման քայլի ենք գնացել»,-ասաց նա:
Փաստաբանը նաեւ նշեց, որ Շվեդիայի արդարադատության կանցլերն արդեն Շվեդիայի ոստիկանությանը հարցում է ուղարկել քրեական գործին վերաբերող ամբողջ ինֆորմացիան ստանալու համար:
Շվեդիայի դատախազությունը հրաժարվել էր Մարկ Սաֆարյանին տրամադրել քրեական գործին վերաբերող տեսագրությունները:
Մարկ Սաֆարյանը մեզ հետ զրույցում նշել էր, որ դժգոհ է քրեական գործի նախաքննությունից:
Ավելի վաղ NEWS.am-ի հետ զրույցում Դավիթի ընկեր Խորեն Սինանյանը նշել էր, որ Դավիթը մահացել է շվեդական ոստիկանության արհամարհական վերաբերմունքի պատճառով: Ըստ Սինանյանի՝ ՀՀ քաղաքացի Դավիթ Բարսեղյանը որպես զբոսաշրջիկ մեկնել էր Շվեդիայի Օրեբրո քաղաք: Երբ Դավիթի ինքնազգացողությունը վատացել է, ընկերները նստեցրել են մեքենան, որպեսզի տանեն հիվանդանոց, սակայն ոստիկանները կտրել են ճանապարհը եւ թույլ չեն տվել Դավիթին հասցնել հիվանդանոց:
