ՄԻԵԴ-ը Հայաստանի կառավարությունից պահանջել է մինչեւ «Սասնա ծռեր» խմբի անդամ Հովհաննես Հարությունյանի կալանքի վերաբերյալ որոշում կայացնելը, բժիշկների խումբ ձեւավորել, որն էլ կորոշի՝ արդյոք նա այդ հիվանդությունների առկայության դեպքում կարող է մնալ կալանավայրում, թե անհրաժեշտ է տեղափոխել քաղաքացիական հիվանդանոց: Այս մասին NEWS.am-ի հետ զրույցում ասաց Հովհաննես Հարությունյանի շահերի պաշտպան Հայարփի Սարգսյանը՝ նշելով, որ ՀՀ կառավարությունը մինչեւ այժմ չի կատարել ՄԻԵԴ-ի պահանջը:
«Այժմ Հովհաննեսին քաղաքացիական հիվանդանոց հետազոտության են տեղափոխել ոչ թե նրա համար, որ ՄԻԵԴ-ն է պահանջել, այլ նրա համար, որ արտասահմանից ժամանած բժիշկները նրա մոտ ոսկրի վարակ են կասկածել»,-ասաց նա:
Հայարփի Սարսգյանի խոսքով, ինքն է արատասհամնից բժիշկներ հրավիրել՝ իր պաշտպանյալին հետազոտելու համար. ԱՄՆ-ից եկած բժշկին թույլ չեն տվել մտնել Հովհաննեսի մոտ, բայց Նիդերլանդներից եկածին՝ թույլ են տվել:
«Հովհաննես Հարությունյանն այս պահին գտնվում է այստեղ ոչ թե նրա համար, որ ՄԻԵԴ-ն է նման որոշում կայացրել, այլ նրա համար, որ ոսկրային ինֆեկցիան պետք է ստուգվի, այսինքն, ՄԻԵԴ-ը Հայաստանի կառավարությունից պահանջել է ստեղծել համապատասխան բժշկական խումբ, որն էլ կորոշեր, թե որ հիվանդանոց կտեղափոխեն Հովհաննեսին, բայց կարող ենք արձանագրել, որ կառավաոթյունը ՄԻԵԴ-ի պահանջը չի կատարել»,-ասաց նա:
Ավելի վաղ տեղեկացրել էինք, որ «Սասնա ծռեր» խմբի անդամ Հովհաննես Հարությունյանը «Նուբարաշեն» ՔԿՀ-ից տեղափոխվել է Վնասվածքաբանության եւ օրթոպեդիայի գիտական կենտրոն, նրա մոտ կասկածվում է ոսկրի վարակ:
Հիշեցնենք, որ Հովհաննես Հարությունյանը ոտքի ծանր վիրավորում էր ստացել ոստիկանության ՊՊԾ գնդի տարածքում, «Էրեբունի» բժշկական կենտրոնում նրա ոտքը մեկ անգամ վիրահատել են:
Հովհաննես Հարությունյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է:
