«Ծառուկյան» դաշինքի առաջնորդ Գագիկ Ծառուկյանն այսօր՝ մարտի 23-ին, Սեւանում ընտրողների հետ հանդիպմանը խոստովանել է, որ նախօրեին Եղեգնաձորում իրեն դիմած տարեց կնոջն օգնել է, բայց ոչ թե տեղում ու անձամբ, այլ ժամեր անց «ընկերների միջոցով»:
Գագիկ Ծառուկյանը բեմահարթակից հայտարարել է, որ իրեն դիմել է 85-ամյա մի տատիկ եւ ասել, որ ոտքը կոտրված է, գումար չունի, սակայն հիվանդանոցում հրաժարվել են բուժօգնություն ցուցաբերել:
«Տատիկ ա մոտեցել ինձ, ամուսինը մահացել ա, ընտանիքը դուրսն ա, ոտքը կոտրված հիվանդանոց ա գնացել, գումար չի ունեցել, հետ են դարձրել: Ո՞նց կարելի ա 84 տարեկան տատիկին չօգնել: Իհարկե, պարոն Ծառուկյանին ասել են, որ եթե ինչ-որ մեկին օգնեմ, դատի կտան, պարոն Մուկուչյանն ա ասել: Ես ասում եմ՝ բարեգործ մարդ եմ, չեմ ասում, որ օգնեմ ձեզ, ինձ ընտրեք: Քունս չի տարել, համարը վերցրել եմ, հանձնարարել եմ իմ ընկերներին, զանգել են, գնացել են, գումարը տվել են, մի բան էլ ավել են տվել, տեղում չեմ արել, ինձ ճիշտ հասկացեք, որ չանեի, քունս չէր տանի, 85 տարեկան տատիկ էր, ո՞նց կարաս ուշադրություն չդարձնես, ում էլ դիմեր, կօգներ»,- ասել է Գագիկ Ծառուկյանը:
Նշենք, որ Ընտրական օրենսգրքի համաձայն, նախընտրական քարոզչության ժամանակ կուսակցություններին արգելվում է ընտրողներին անհատույց կամ արտոնյալ պայմաններով տալ կամ խոստանալ դրամ, սննդամթերք, ապրանքներ: Արգելվում է նաեւ մատուցել կամ խոստանալ ծառայություններ: Գագիկ Ծառուկյանը մի քանի անգամ բեմահարթակից խոստւմներ է տվել:
ԿԸՀ նախագահ Տիգրան Մուկուչյանն ավելի վաղ NEWS.am-ին հայտնել էր, որ նման խոստումներ տալը օրենսդրության խախտում է:
