«Անի Պլազա» հյուրանոցում փետրվարի 11-ին մահացած հայտնաբերված Զուրաբ Նեմսաձեին դին դեպքից մեկ ամիս անց տեղափոխվել է Ռուսաստանի Դաշնություն: Այս մասին NEWS.am-ին ասաց տուժողի ներկայացուցիչ, «Փինկ Արմենիա» հասարակական կազմակերպության իրավաբան Հասմիկ Պետրոսյանը:
Նեմսաձեին արդեն հուղարկավորել են Ռուսաստանում:
«Զուրաբ Նեմսաձեի հարազատներին գտնելու ուղղությամբ Հայաստանի իրավապահները ոչինչ չէին անում, սակայն մենք կարողացել ենք գտնել նրանց: Հարազատները ծանր հոգեբանական վիճակում են գտնվում եւ դեռեւս չեն կարողանում մտնել գործի մեջ, դրա համար այս պահին տուժողի իրավահաջորդ ոչ ոք չի ճանաչվել»,- ասաց իրավաբանը:
Հասմիկ Պետրոսյանի խոսքով, փորձաքննությունների եզրակացություններն այս պահին չեն ստացվել:
Նշենք, որ ավելի վաղ «Փինկ Արմենիա» ՀԿ-ն հաղորդագրություն էր տարածել այն մասին, որ Զուրաբն իրենց պատմել է, որ փետրվարի սկզբին Հայաստան է եկել իր զուգընկերոջ խնդրանքով, որպեսզի օգնի նրան ազատվել ընտանիքի ճնշումներից:
«Իրավապահ մարմիններին կոչ ենք անում առանց նախապաշարումների պարզել իրողությունը, բացահայտել իրական մեղավորներին ու պատասխանատվության ենթարկել:
Հարկ է գիտակցել, որ այս պատմությունն արդեն ողբերգության է հանգել, սակայն եթե հավանականություն կա մեկ այլ ողբերգության, անհապաղ պետք է կանխել»,- ասվում է ՀԿ հայտարարության մեջ:
Ավելի վաղ հաղորդվել էր, որ 2017թ. փետրվարի 11-ին «Անի Պլազա» հյուրանոցի համարներից մեկում այլ երկրի քաղաքացու դիակ է հայտնաբերվել: Ըստ լրատվամիջոցներում առկա տեղեկատվության` 23-ամյա երիտասարդի դաստակները վնասված են եղել, եւ երբ նրան հայտնաբերել են, նա եղել է բերանքսիվայր վիճակում ընկած: Մահացած երիտասարդի դեմ դեպքից օրեր առաջ բողոք էր ներկայացրել նրա ծանոթ մեկ այլ երիտասարդ՝ մեղադրելով իր կամքից անկախ իր հետ սեռական հարաբերություն ունենալու եւ դրանց վերաբերյալ լուսանկարները համացանցում տեղադրելու մեջ։
Նշենք, որ այդ երիտասարդը նույնպես ինքնասպանության փորձ էր կատարել:
Դեպքի առթիվ քրեական գործ է հարուցվել: Կատարվում է քննություն: