Ամերիկահայ ռոք երաժիշտ եւ երգահան, աշխարհահռչակ System of a Down խմբի հիմնադիր եւ մենակատար Սերժ Թանկյանն ու կանադահայա կինոռեժիսոր Ատոմ Եգոյանը մարտի վերջին արդեն կլինեն Հայաստանում: Այս մասին «Ազատություն» ռադիոկայանի եթերում ասել է կանադահայ դերասանուհի Արսինե Խանջյանը, որն արդեն Հայաստանում է:
«Մենք դիտորդական առաքելություն ենք իրականացնելու խորհրդարանական ընտրությունների ժամանակ: Բացի Թանկյանից, Նազարյանից, Եգոյանից եւ ինձնից՝ շատ մարդիկ են մեզ արձագանքել եւ ապրիլի 2-ին լինելու են Հայաստանում»,- ասել է նա:
Եթե ապրիլի 2-ին մեծ թվով խախտումներ արձանագրվեն եւ ժողովուրդը որոշի փողոց դուրս գալ պայքարի համար, Արսինե Խանջյանը չբացառեց, որ իրենք նույնպես կմիանան նրանց: Դիտարկմանը, թե խոսակցություններ կան, որ այս դիտորդական խմբի իրական նպատակն է աջակցել «Օհանյան-Րաֆֆի-Օսկանյան» դաշինքին, Արսինե Խանջյանը զարմացավ՝ ինչպես են նման լուրեր տարածում. «Իրականությանը չեն համապատասխանում այդ տեղեկությունները, մենք անկախ մարմին ենք Հայաստանում, ինքներս ենք հոգում մեր ծախսերն ամբողջ, մենք կանգնած ենք հասարակության կողքին, ոչ մի կուսակցության կամ ուժի չենք աջակցում»:
Նշենք, որ մի խումբ հայտնի սփյուռքահայ մտավորականներ 2016թ. սեպտեմբերին ստեղծել են «Արդարություն Հայաստանում» նախաձեռնությունը, որի նպատակն է նպաստել Հայաստանում ժողովրդավարական փոփոխություններին։ Նախաձեռնությունը մտադիր է մինչեւ ապրիլ վերապատրաստել սփյուռքահայ դիտորդների, որոնք կժամանեն Հայաստան` հետեւելու ընտրությունների ընթացքին:
