Երեւանի Շենգավիթ շրջանում ընտրողների հետ հանդիպման ժամանակ պատգամավորի թեկնածու Սամվել Ալեքսանյանը խոստացել է բժշկին օգնել աշխատանքի տեղավորվել։
Բժիշկ Սերգեյ Կիրակոսյանը մանկական նեֆրոլոգ է։ NEWS.am-ի թղթակցի հետ զրույցում նա ասել է, որ օրդինատուրան եւ ասպիրանտուրան Մոսկվայում է ավարտել։ Հայաստան վերադառնալով՝ նա այստեղի հիվանդանոցներից մեկում մանկական նեֆրոլոգիայի բաժանմունք է բացել, հետո կրկին Մոսկվա է մեկնել, պաշտպանել դոկտորական ատենախոսությունը։ 1993-ին նա Հայաստան է վերադարձել՝ այստեղ աշխատելու համար։
2008-ին Բժշկական համալսարանի նախկին ռեկտոր Գոհար Քյալյանը բժիշկ Կիրակոսյանին թոշակի է ուղարկել։ Այժմ նա աշխատում է Արմավիր քաղաքում, որտեղ ստիպված է ամեն օր գնալ Երեւանից։ Նրա խոսքով՝ ինքը շատ կցանկանար կրկին աշխատել Երեւանում, ուստի նման խնդրանքով դիմել է Սամվել Ալեքսանյանին։
Սամվել Ալեքսանյանն ու նրան ուղեկցող Երեւանի քաղաքապետի տեղակալ Դավիթ Օհանյանը՝ լսելով բժշկի խնդրանքը, խոստացել են օգնել նրան աշխատանքի տեղավորվել Ալեքսանյանին պատկանող «Աստղիկ» բժշկական կենտրոնում։
«Մենք կասենք, Ձեզ այնտեղ կընդունեն։ Բայց դուք պետք է հարցազրույց անցնեք՝ գիտեք, այնտեղ մասնագիտական մոտեցումները ինչ մակարդակի վրա են։ Ասատուր Մարատիչին (Ասատուր Ասատրյան, «Աստղիկ» բժշկական կենտրոնի տնօրեն-խմբ) մոտեցեք իմ անունից», - ասել է Դավիթ Օհանյանը։
