Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն այսօր՝ մարտի 23-ին, մերժել է «Սասնա Ծռեր» խմբի անդամ Արամ Հակոբյանի նկատմամբ ընտրված խափանման միջոցը՝ կալանավորումը, փոխարինել գրավով: Այս մասին NEWS.am-ին ասաց նրա պաշտպան փաստաբան Դավիթ Գյուրջյանը:
«Դատարանը հաշվի չառավ այն հանգամանքը, որ Արամ Հակոբյանը լուրջ առողջական խնդիրներ ունի»,- ասաց փաստաբանը:
Նշենք, որ մարտի 22-ին նշանակված՝ կալանքի ժամկետը երկարացնելու մասին միջնորդության քննության նիստին Դավիթ Գյուրջյանը ներկայացրել էր Արամ Հակոբյանի բժշկական փաստաթղթերի փաթեթը, ինչպես նաեւ այն, որ ՔԿՀ-ում Արամ Հակոբյանի նկատմամբ պատշաճ բուժհսկողություն եւ բուժօգնություն չի տրամադրվում: Փաստաբանը միջնորդել էր կալանավորումը փոխարինել գրավով:
Ավելի վաղ Դավիթ Գյուրջյանը հայտարարել էր, որ Արամ Հակոբյանը դեռեւս 2012թ.-ին ենթարկվել է միզապարկի, ապա 2014թ.` ուղեղի քաղցկեղի հեռացման վիրահատությունների:
«Դեռեւս 2016թ. դեկտեմբերին «Երեւան-Կենտրոն» ՔԿՀ ներկայացրել ենք դիմում Արամ Հակոբյանի առողջական վիճակը պարզելու նպատակով, նրա հետազոտությունն ապահովելու նպատակով, սակայն դիմումը մերժվել է այն պատճառաբանությամբ, որ նման անհրաժեշտություն չկա, իսկ Արամ Հակոբյանի առողջական վիճակն, ըստ ՔԿՀ-ի բժիշկների, գնահատվում է բավարար:
Սույն թվականի փետրվարին Արամ Հակոբյանի առողջական վիճակը կտրուկ վատթարացել է եւ նա ուղեղի կաթվածի (ինսուլտ) նախանշաններով, այն է՝ աջ վերջույթների անկառավարելիություն եւ խոսակցական ֆունկցիայի խանգարում, տեղափոխվել է «Սուրբ Գրիգոր Լուսավորիչ» ԲԿ, որտեղ ախտորոշվել է ուղեղի արյան շրջանառության խախտում: Մեկ օր ներերակային ներարկումներ ստանալով՝ Արամ Հակոբյանը տեղափոխվել է «Դատապարտյալների հիվանդանոց», որտեղ չի ստացել ոչ մի բուժում, այնուհետեւ, մոտ 6 օր անց՝ «Երեւան-Կենտրոն» ՔԿՀ, որտեղ վերջինս ստացել է ներերակային ներարկումների 2 շաբաթվա կուրս: Ներարկումների կուրսից հետո վիճակը որոշակիորեն լավացել է, սակայն, ինչպես տեղեկացանք Արամ Հակոբյանի հետ վերջին տեսակցության ժամանակ, ոչ շարժողական, ոչ խոսակցական ֆունկցիաները լիովին այդպես էլ չեն վերականգնվել»,- հայտարարություն էր տարածել փաստաբանը:
